【Now Sports】已抵達泰國備戰泰國羽毛球公開賽的香港代表隊,在酒店隔離多天,今日(6日)已可以到球場練習,港隊「1哥」伍家朗表示自己會格外小心注意衛生。
香港羽毛球代表隊一行7名球員今次出行都份外小心,「1哥」伍家朗表示由去到機場已做足防疫措施,「我哋去到機場就已經戴晒口罩面罩啦,之後臨上機都著晒保護衣先登機,到咗泰國酒店之後就即刻安排我哋做檢測,然後就上房唔准再出房。都幾精神崩緊,因為無時無刻都要注意衛生意識,而且又聽到外國一啲球員都有受感染,所以都要格外小心。」
家朗透露酒店隔離的膳食,三餐都由大會安排,但就笑言味道一般同埋份量不足夠,要另外叫room service或者要自己煮先足夠。隔離期間都是食飯睇ipad打機打發時間,不過每日都會在房間訓練保持狀態,「每日都會有一至兩課嘅體能訓練,雖然冇得打波,但都盡量keep住體能唔好下跌咁多。」
家朗表示,大隊於1月3日抵達,1月6日就可以去球場訓練,「6號(今日)可以去球場練波,大會都承諾每一個國家隊(代表隊)嘅訓練完之後,都會有半個鐘消毒先到下一隊練,但都係會有少少擔心,因為始終球場可以係好多細菌嘅地方,練完波都會即刻洗手換晒啲衫褲。」
被問到相隔9個月終於可以重返賽場,將以怎樣的心態迎戰,家朗說,「心情就會有啲緊張又期待,但唔會刻意定啲咩目標畀自己,因為太耐冇比過賽,都係盡全力發揮自己水平就ok。」
泰國將於本月12至17日及19至24日連續舉行兩個公開賽,繼而在27至31日上演世界羽聯巡迴賽總決賽。港隊休戰9個月後,伍家朗及李卓耀將出戰男單、張雁宜參與女單,以及鄧俊文/謝影雪、張德正/吳詠瑢出戰混雙項目,希望透過實戰為3月重啟的東京奧運計分賽做好準備。
泰國羽毛球公開賽
Now TV 631台直播賽程
12/01 10:00 32強
13/01 10:00 32強
14/01 10:00 16強
15/01 12:00 半準決賽
16/01 12:00 準決賽
17/01 13:00 決賽