【Now Sports】如果可以選擇,相信大家都希望忘記甚至永久刪除2020年。阿根廷傳奇球星馬勒當拿本周因心臟病逝世,佢出神入化嘅球技、一人之力獨闖龍潭、改變球賽局勢等精彩畫面,全部都會留喺球迷心目中。球王一生對足球嘅貢獻及影響,絕對值得令人尊重!
撰文:梁冠聰|Now足球評述員
英超本周矚目大戰肯定係車路士主場對熱刺,呢場比賽除咗係倫敦打吡,仲係榜前列大戰加師徒對決。徒弟林柏特帶領嘅車路士各項比賽近10場不敗,當中有7場保持清白之身,門將伊度亞度文迪肯定居功至偉。球隊近幾仗確立4人防線,隊長艾斯比列古達穩打穩紮穩佔右閘一席,戰術上配合左閘捷維爾出擊型踢法,艾斯比列古達傾向較保守地留守後場,靜候適當時機上前助攻。中堅蘇馬擁有較強對抗能力,配合經驗老到、位置感良好嘅泰亞高施華,效果相當不俗。
林柏特在中場沿用3人一字平排模式,近幾場干堤取代佐真奴踢中場中位置,令干堤再次發揮覆蓋球場每一寸草地嘅威力。進攻線上施耶殊、艾巴咸及添姆雲拿產生巨大化學作用,對上6場轟入18球。3人同樣具備速度及單對單盤扭能力,施耶殊習慣喺右路拐入中路以「半傳半射」方式勁射遠柱;艾巴咸禁區內埋門觸角及把握力有一定保證;添姆雲拿不時利用艾巴咸所製造的空間,殺入中路後上入楔爭取入球。
「師父」摩連奴上場以招牌菜穩守突擊擊敗曼城升上榜首,賽後摩佬笑言只要能夠拎到3分,輸晒任何數據都唔介意。職業足球講求成績,不論踢法華麗定醜陋,最重要都係贏波!摩佬近期沿用4-2-3-1陣式,防線同藍戰士一樣搵到最適合配搭,新加盟的杜赫迪及域基朗上落頻率極高,足以配合球隊防線收至後場並上前參與反擊。中堅迪亞把握機會證明有能力成為可依賴球員,開季至今夥拍艾達維特表現相當穩定。
防線並無受到太大壓力,全因中前場球員嚴格執行防務工作。摩連奴今季中場排陣模式跟去季屈福特相近,3人中場中球員擁有強橫攔截力及紀律,雙防中靴爾堡及梅沙施素高主要維持攻守及左右平衡,避免出現被對手製造人多打人少優勢。進攻中場當比利守強於攻,不過可以喺反擊時快速支援前場,成為摩連奴近期最愛之一。哈利簡尼及孫興民繼續維持高水平,球隊今季能保持比賽張力及反擊銳度,全賴一眾後備兵洛希素、盧卡斯武拿等有質素球員。
究竟最終係熱刺能夠擴大榜首領先優勢,定係車路士贏波喺聯賽榜超越熱刺?相信今場比賽彼此先站穩陣腳,務求減少犯錯,中場搶奪及攻守轉換將成勝負關鍵。
車路士VS熱刺
Now TV 621台 30/11 00:30直播
Now TV 611台4K直播
Now E 同步直播