【Now Sports】周三英超,利物浦在主場捧盃前演入球騷,以5:3擊敗車路士。
利物浦在這場封王派對以強陣出擊,前線有沙拿、沙迪奧文尼、費明奴(Roberto Firmino),中場拿比基達回歸正選。車路士排出3-4-3陣式,近期狀態大勇的曼治跟韋利安支援射手基奧特。
紅軍先憑拿比基達、阿歷山大阿奴先後轟入世界波,以2:0領先車路士。43分鐘,雲拿當於一次角球攻勢建功,利物浦擴大優勢至3球。完半場前,基奧特執雞,為車路士追至1:3。
下半場繼續多波入,費明奴在55分鐘打破今季於晏菲路的入球荒。佩利錫其後騷哥利,先個人突破後妙傳艾巴咸建功,再自己抽入世紀波,一度追成3:4。紅軍最終由張伯倫奠定5:3勝局。
車路士全失3分,同時失去奠定歐聯席位的機會,現時以63分排第4位,跟第3位曼聯同分,多第5位李斯特城1分。