【Now Sport】11年前嘅今日,皇家馬德里官宣同里昂達成共識簽下當年21歲嘅賓斯馬,當時嘅領隊係柏歷堅尼。
撰文:步大力熊
皇馬球迷對賓斯馬(Karim Benzema)一直又愛又恨,有鍾意佢喺隊中做嘅連繫,或無私嘅助攻(134);有討厭佢經常門前失機,有次基斯坦奴朗拿度都睇唔過眼叫球迷唔好噓賓斯馬。球迷之間有個笑話,指賓斯馬要儲氣半季先可以有所發揮。
雖然係咁,但明顯喺皇馬歷任教練心入面,賓斯馬愈嚟愈有份量。西班牙媒體當年指摩連奴公開話賓斯馬係一隻貓,因為賓斯馬並非好似希古恩咁係一隻獵犬。
「當你去打獵,你當然想帶隻獵犬,但你得隻貓時,你都要帶佢去,你又唔可以自己去。雖然你會捉少一些,但你都會捉到獵物。」
(註:呢句其實黎自葡文諺語 "Quem não tem cão, caça com gato" 直譯為「一個無狗嘅人會帶隻貓去打獵」,摩佬應該只係想表達,一個人要善用佢嘅資源做到最好。不過自此西班牙媒體都用 El Gato 西班牙話 「貓」 代表賓斯馬。)
後來,賓斯馬喺佢嘅紀錄電影「LeKBenzema」都坦言為此而唔開心,亦有為呢件事同摩佬傾咗一個鐘,之後摩佬就再無關於貓狗嘅言論。摩佬之後都話,其實佢只係希望賓斯馬可以更好發揮佢嘅天賦,變成一個殺手。
而賓斯馬都冇令摩連奴失望,最後2013年希古恩同賓斯馬嘅鬥爭中,流言指C朗認為希古恩傳波唔夠多, 所以賓斯馬就留低咗。事實上, 賓斯馬喺製造機會同助攻上都成就咗皇馬嘅C朗;佢亦喺安察洛提麾下放棄咗射手一職,為「BBC」(加利夫巴爾、賓斯馬、C朗)做串連,皇馬5年4奪歐聯中「 BBC」 嘅攻擊絕對係成功嘅關鍵。佢自己都話「我唔再係貓,我係獅子!」
賓斯馬喺安察洛提、賓尼迪斯、施丹、盧柏迪古、蘇拿利,再返嚟施丹手上,賓斯馬都依然係必然正選。特別係C朗離開皇馬之後,佢意識到自己要擔大旗,亦慢慢開始重新背負射手一職。
2020年6月18日,賓斯馬喺西甲對華倫西亞射入佢皇馬生涯第242、243球,超越普斯卡斯成為球會歷史上第5位最多入球者。
今日為止,賓斯馬為皇馬贏過:
西甲:2
西班牙國王盃:2
西班牙超級盃: 2
歐聯: 4
UEFA超級盃:3
世冠盃:4
復賽後,賓斯馬狀態唔錯,每場正選之餘,有入球亦繼續交出助攻。皇馬暫時以71分,踢少一場領先70分嘅巴塞成為西甲榜首。或者今季賓斯馬再有機會為皇馬拎多一座西甲。
雖然球迷又愛又恨,但無論如何佢將會成為皇馬歷史重要一員係可以肯定嘅。問題反而係:賓斯馬會唔會可以喺班拿貝掛靴呢?真係一個好難答嘅問題,或者唔太耀眼反而可以留到最後。
撰文:步大力熊
要做一個理性球迷?不了,成為球迷本身就是一件不理性而且瘋狂的事。
本欄逢周二及周四上載
周二 歪花
周四 步大力熊/泰萊
email:ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen
【西甲】皇家馬德里VS基達菲 Now TV 632台03/07 04:00直播
Now E 同步直播