0
0
梁冠聰:雙藍會交鋒 攻力十足勢鬥攻

梁冠聰:雙藍會交鋒 攻力十足勢鬥攻

曼城復賽後表現勇銳。 (©AFP)

【Now Sports】歐洲各大聯賽因疫情停擺後逐漸全面復賽,正當德甲及西甲如火如荼,英超亦不敢怠慢,榜首利物浦封王只係時間問題,緊隨其後嘅曼城、李斯特城及車路士需力保來屆參加歐聯席位。今周英超上演雙藍會大戰,車路士21日首次作賽,有驚又有險地以2:1擊敗阿士東維拉;曼城23日踢咗復賽後第2仗,最終以5:0輕取般尼,兩強相遇實行搏到底!

撰文:梁冠聰|Now足球評述員

球員久疏戰陣,狀態必成疑問。車路士上仗對維拉大部份時間控制比賽,控球比率近75%,全場合共製造19次攻門但僅5次命中目標,整體表現仍有待改善。一眾後防球員表現繼續令人擔心,中堅基斯甸臣、魯迪加或蘇馬等始終畀唔到球迷可依賴嘅感覺,即使個人防守能力,抑或後防整體配合同樣缺乏化學作用,領隊林柏特絕對需要正視後防不穩問題。另外,中場掃蕩力較弱以致掩護防線能力較低,雖然干堤掃蕩力屬全球之冠,但始終「一人難敵四腳」,技術型嘅佐真奴同哥華傑治都要幫下手。個人認為擺放雙防中較為理想,起碼令球隊更容易搵到攻守平衡,唔會短時間內突然被對手製造太多人數優勢。

疫情之下若要講到最積極擴軍球隊,車路士敢認第2,都無人敢認第1。較早前先後以3800萬鎊簽入阿積士翼鋒施耶殊,以及6700萬鎊簽入萊比錫射手添姆雲拿,加上美國快翼佩利鍚及艾巴咸,藍戰車進攻鋒線令人十分期待。期待之前都要睇下現況,前鋒艾巴咸自季中後狀態開始下滑,幸好另一箭頭基奧特能交出功課。兩者同樣具備一定埋門質素,最大分別在於年齡及經驗,艾巴咸正面對青年球員最常見問題,難以維持場上的穩定;至於見慣風浪嘅基奧特今季上陣次數寥寥可數,卻能維持一定入球效率,相信佢哋之間除咗有正面影響之外,基奧特如何維持場上穩定度,絕對值得艾巴咸學習。

曼城來屆係咪可以參與歐洲賽事,仍要等待7月份最終判決,當刻只能盡最大努力爭取最好成績。球隊復賽後整體表現尚算理想,左中堅拉樸迪傷癒復能夠提升防線穩健度之餘,同時有助改善球隊後上組織能力。不過,早前艾歷加西亞喺比賽中頭部嚴重受傷,現階段健康情況仍然有待觀察,加上奥達文迪及史東斯今季表現失色,令中堅位置選擇買少見少。左右二閘卡爾獲加及賓祖文文迪過去2場防務工作上未受太大考驗,卡爾獲加貫徹防守穩健兼具備侵略性作風,有時候會移入中路當作防守中場,協助球隊參與進攻組織,相反,賓祖文文迪就有攻強守弱嘅感覺。

講到藍月亮人腳最齊位置非中場莫屬,洛迪靴蘭迪斯及根度簡輪流出任單防中,前者用波能力較好卻欠缺經驗令位置感較差;後者攻守平均,但場上表現時好時壞。左右進攻中場選擇頗多,既有中場大腦大衛施華策劃攻勢,全能嘅迪布尼能傳擅射,不斷為前鋒製造入球機會。另外,如果需要加強中路盤扭能力,賓拿度施華及霍頓亦完全能夠勝任。邊路進攻方面,曼城從來不缺攻擊能手,不過,隨著哥迪奧拿早前宣佈辛尼將不續約,相信曼城球迷再次見到佢為球隊比賽嘅機會十分渺茫。排除辛尼後,翼鋒選擇有史端寧及馬列斯,加上哥帥推崇備至嘅加比爾捷西斯,將繼續成為邊路攻擊發動點。

從休息角度嚟睇,車路士多2日休息會較為著數,不過,從球員狀態嚟計,近幾場採用輪換戰術嘅曼城則較為秤先。短時間備戰復賽對球員一啲都唔容易,體力付出及身體對抗絕對係一大挑戰,所以球員要學識保護自己身體之餘,喺場上付出最大貢獻。

車路士VS曼城

Now TV 621台26/06 03:15直播

Now TV 611台4K直播

Now E 同步直播

  1. 更多
  1. 【出境高峰】羅湖落馬洲等多個口岸逼滿離境人潮
    【出境高峰】羅湖落馬洲等多個口岸逼滿離境人潮
    49分鐘前
  2. 倫敦希思羅機場數百邊檢人員擬下月罷工四天
    倫敦希思羅機場數百邊檢人員擬下月罷工四天
    32分鐘前
  3. 南非巴士墮橋45死 僅一名8歲女童生還
    南非巴士墮橋45死 僅一名8歲女童生還
    33分鐘前
  4. 台北素食餐廳中毒案 廚師問話後獲准離開
    台北素食餐廳中毒案 廚師問話後獲准離開
    34分鐘前
  5. 日本服用過小林製藥紅麴保健品的死者增至五人
    日本服用過小林製藥紅麴保健品的死者增至五人
    35分鐘前
  6. 東涌裕泰苑電飯煲起火三人送院
    東涌裕泰苑電飯煲起火三人送院
    36分鐘前
  7. 再有照顧者悲劇發生 議員促多方面及早介入
    再有照顧者悲劇發生 議員促多方面及早介入
    37分鐘前
  8. 免費乘搭天星小輪宣傳「藝術3月 」
    免費乘搭天星小輪宣傳「藝術3月 」
    39分鐘前
  9. 紐卡素中場東拿利涉違規賭波被英足總起訴
    紐卡素中場東拿利涉違規賭波被英足總起訴
    1小時前
  10. 美國據報草擬名單 阻止中國晶片商獲關鍵工具
    美國據報草擬名單 阻止中國晶片商獲關鍵工具
    1小時前