【Now Sports】贏過U15世錦賽冠軍，又屢度獲選香港傑出青少年運動員的風帆女將麥卓穎，從來忙於兼顧運動與學業，一場全球疫症倒是令她更珍惜與家人共處的時光。她又感謝香港人的無私分享與自律，盼大家繼續為抗疫付出。
「唔可以好似平時咁喺課室上堂，用online lesson代替傳統模式令上堂時間減少，令老師教嘅內容都比之前少，但疫情期間令我哋喺屋企嘅時間多，功課量自然都多咗，學習時間變得好彈性。例如我依家就可以食完早餐做功課，食完午餐就寫番上完堂嘅notes，晚餐前後嘅時間就用嚟補習，比平時多咗屬於自己嘅時間。
因為疫情，體院想我哋青少年運動員停止練習，減低風險，所以我哋都停咗訓練。平時除咗上online lesson，天氣好嘅話都會同屋企人喺赤柱附近行山，疫情之前，好多時間都要返學同練習，好少時間陪屋企人出街，疫情期間，就多咗共處時間。
晏晝通常同屋企人落海玩獨木舟，細個未開始玩滑浪風帆嘅時候，都有玩過獨木舟，鍾意嗰種喺海中曬住太陽同朋友玩嘅感覺；夜晚通常就落樓下嘅籃球場打波或者去海旁跑步，keep住體能。
平時星期二、四去體院訓練，有專業嘅教練做重量同體能訓練，依家冇咗器材幫助訓練，只能夠靠平時落街跑步或者喺屋企做fitness。星期六、日唔可以有水上訓練，變相少咗時間適應新板種，比其他國家嘅選手輸蝕少少。
因為滑浪風帆2024嘅奧運板種，由傳統嘅RS:X改成全新嘅板種IQ:Foil，IQ:Foil係利用水翼嘅原理令風帆升離水面，令速度增加幾倍。短期目標希望可以用盡快熟悉IQ:Foil，練習全新嘅技術。遠期目標希望可以參加亞運會。
我體會到訓練唔係必然，應該把握每次進步嘅機會，亦體會到香港人真係好團結，每次有困難都好齊心，雖然口罩同酒精呢啲清潔用品供應緊張，但香港人都好樂意分享比有需要嘅人，好多謝大家嘅無私同自律。
最後，希望香港人都繼續為香港付出，一齊抗疫，希望感染嘅人可以康復，大家都身體健康。香港加油！」
麥卓穎
（滑浪風帆）
【編按：sports.now.com一連數天請來幾位本地體壇精英親述最新訓練狀況之餘，與港人互勉，一同集氣共度時艱。】
相關文章：
【港將抗疫集氣】陳肇鈞：回復應有嘅香港
https://sports.now.com/home/news/details?id=28955788778
【港將抗疫集氣】王蘊妮：低處未算低
https://sports.now.com/home/other/details?id=28939445745
【港將抗疫集氣】周健宏：荒謬疫症一齊捱！
https://sports.now.com/home/other/details?id=28939445707
【港將抗疫集氣】呂麗瑤：為飲杯靚咖啡感恩
https://sports.now.com/home/other/details?id=28925719814