【Now Sports】最近大家都見到市面開始多返人出嚟，打招呼嘅時候一句「身體健康」變得貼心又窩心。做運動增強免疫力成為咗大部份人生活嘅一部份，大家喺Facebook或IG都會見到好多介紹家中fitness嘅video 同時亦見到好多人share行山要攞走自己口罩。抗疫期間，跑步又同平時有咩唔同呢？
撰文：劉德龍
呢段期間，跑步嘅重點唔係跑得有幾快同幾遠，而係點樣跑得安全。就等我哋睇下由你準備出門口前要留意啲咩：
1）喺屋企拉咗筋先
為免減少喺出面嘅停留時間，喺屋企做咗靜態同埋少量動態熱身先，落到街就可以開始慢跑。
2）一定要帶口罩落去
由你出門口到開跑前一定要帶口罩，可能中間只係幾分鐘嘅時間，正所謂「你唔驚，其他人都驚！」你諗下呢段期間，你喺街見到有人唔帶口罩，你會用咩目光去睇呢個人。Respect！
3）準備適當抗疫物資
如果你只係落樓下簡單跑個步，一個口罩同埋搵一個細袋或褲袋去袋住個口罩就夠，但如果你係去運動場跑步，我諗你準備好圖中啲抗疫物資就安全啲
（圖左一）酒精紙，用作清潔locker鎖嘅位置；
（圖左二）酒精搓手液，熱身前一定要用，因為你跑跑吓好多時候會忍唔住用手去抹汗；
（圖右二）酒精噴霧，噴一噴locker入面同埋你嘅袋；
（圖右一）洗手液，跑完步換衫前用，我諗你都見過一張洗手液發霉嘅相，會驚出面嘅洗手液唔安全；
以往有人咁樣做，你會覺得嗰個人有潔癖，但依家你見到有人咁做，你會安心同佢跑步。
4）跑完步帶返個口罩
如果我落街跑步，我跑完步第一件事係帶返口罩，返到屋企先做cool down。如果去運動場跑，飲完水就帶返口罩再cool down。你唔會知幾時會中招。
Well……點解會有分別？我習慣咗慢跑就落街，快跑先去運動場。你知啦，慢跑落運動場好易阻到人快跑。
5）跑步後減少聚餐
盡量減少一齊食飯，因為你唔知你嘅朋友嘅朋友有冇接觸過外遊人士，可能連你朋友本身都唔知道。盡量唔好邀請跑友食飯，其他人唔知點樣拒絕你，除非你對佢好有信心。一齊食都係自己食自己食物啦，你都唔想成為下一個「邊爐家族」，用公筷係基本嘢。
嘩，你講到咁，不如唔好去跑步。呢樣又唔得嗰樣又唔得。Well……我諗你都唔想日日喺屋企悶到爆，亦都唔想銀包未漲肚腩先漲，更加唔想你心愛嘅人為你擔心及為自己擔心。
非常時期，「基本」跑步做得足，對所有人都係好事，雖然上面講嘅野相當唔「基本」。
撰文：劉德龍
（鐘意跑步但唔叻）
Q：Actually……who are you?
Ans：Google me
【編按：全體抗疫，作為體育人更要積極面對疫情，本欄找來本地運動專家與現役運動員，為大家分享疫情下做運動的心得。逢周一及周四上載】
星期一 劉嘉豪
星期四 劉德龍
