【A&M Diary】曼徹斯特係英國中部最大嘅城市，從前亦係英國一個工業重鎮。近年嘅曼徹斯特除咗商業發展之外，更令大家注目嘅當然係兩支世界級嘅英超球隊：曼聯、曼城。我哋今次嚟曼徹斯特嘅主要目的就係睇波，而我哋就入住萬豪旗下嘅曼徹斯特維多利亞和艾爾伯特萬豪酒店（Manchester Marriott Victoria & Albert Hotel）。
酒店大堂
曼徹斯特維多利亞和艾爾伯特萬豪酒店（Manchester Marriott Victoria & Albert Hotel）位於曼徹斯特市中心，由St Peter’s Square輕鐵站行大約10分鐘就到酒店，非常方便。曼徹斯特曾經係紡織業嘅基地，所以曼徹斯特維多利亞和艾爾伯特萬豪酒店（Manchester Marriott Victoria & Albert Hotel）前身係紡織工廠嘅倉庫，不過內部經過多次番新，大堂充滿時尚設計，完全感覺唔到歷史嘅痕跡。
客房區域
曼徹斯特維多利亞和艾爾伯特萬豪酒店（Manchester Marriott Victoria & Albert Hotel）共設有148間客房同套房，我哋今次就被安排入住1樓嘅豪華家庭房。經過翻新嘅客房，仍保留倉庫嘅天花、少部份牆身同柱躉。不過，因為我哋嘅房間喺一樓，加上窗口亦較小，所以景觀未算好開陽，透光度不足。
因為家庭房嘅關係，所以房間嘅面積非常大，房間有兩張雙人床，就算兩大兩小一齊入住都唔會覺得迫。床褥軟硬適中，床單柔軟，非常舒服；枕頭總共有4個，2個係偏軟2個係偏硬。床頭位置分別設有USB插頭，夠晒方便。
房間內亦設有一個小偏廳，另外，房間亦放有茶包、咖啡包、蒸餾水，風筒、熨斗、燙衫板同夾萬，但就略嫌未有提供雪櫃。
