【Now新聞台】創新科技對未來社會同經濟都好重要，不過香港就成日俾人話呢方面嘅步伐跟唔上其他國家。政府統計處2017年年底公布，2016年本港總研發開支係197.13億元。
統計處報告就顯示，總開支之中，高等教育機構貢獻最多，其次係工商機構，政府機構就貢獻得最少。事實上，總研發開支只係佔本地生產總值(GDP)0.79%，反觀世界銀行嘅數據，2015年世界平均研發支出佔GDP 2.227%，比同年香港嘅0.76%多出一大截。
2015年日本同南韓係亞洲地區中，研發開支佔比較高嘅國家，分別佔GDP 3.28%同4.23%。兩大強國中國同美國都分別有2.07%同2.79%，睇嚟香港要追上國際都要諗諗計。
