【now.com】不是強擠幾粒眼淚，大家便會同情你，當橫洲發展棕地一事還未平，轉個頭政府又再點火，今次燒到去體育界，為覓地建樓，差不多你想得到或想不到的荒謬招數都耍過，就如今次，沒有趕走農鄉，亦沒有摸底，反而一來就踩入一片綠油油的綠化地，並將底牌揭開，向位於沙田石門的傑志中心要地，清楚講到明該地為短期租約，隨時可收地起樓。聽唔明？官威一點再講一次，意思就係︰「租俾你係人情，唔租俾你係道理！」
現屆政府的城市規劃，其實仲衰過小學生砌Lego，見有位就話要起，其實當中有否考慮過居民入住後的種種問題？不是有個細商場幾間便利店一間餐廳就叫處理好民生。現在更差劣的是將一個發展得有點成績的足球計劃推倒重來，而政府就重施必殺技︰覓地重建。無論是一條充滿人情味的鄉村，還是凝聚到一班對足球有熱誠的訓練場地，在政府心目中，就同砌Lego一樣，拆掉了再拼上，所有事都會和好如初，就係咁簡單。
有團體指出，足球中心耗資8,400萬興建，去年9月才正式開幕，是多支球隊的訓練基地，約來年9月便停租，太浪費！不過同政府講浪費，其實是對牛彈琴。因為早前便傳出為興建三跑，機場二號客運大樓大有可能要拆卸，而該建築於2007年以28億港元興建，相比之下，8,400萬？散紙啦！
梁振英由上任以來，已表明要解決房屋問題，又話重中之重，又話成熟一項推一項，仲整埋口號港人港地，結果呢？的確是重中之重，不過是問題嚴重性中最嚴重一個。至於熟與不熟之間，又的確有很多討論空間，要睇政府跟地區人士的熟絡程度，大可以用先易後難頂住先。而港人港地就更好笑，被發展商兜口兜面話港人港地不等於就是要以合理價錢出售。
冇計劃、冇劇本、有頭冇尾、草草收場，一味只花錢去將事件包裝得美輪美奐，到頭來入到場就知是爛片一齣，這種房屋政策不是超班爛片又是甚麼？不是講笑，上年才入伙的沙田水泉澳邨，昨日被發現部分單位出現「豆腐渣」地台，真係要俾5個爛蕃茄獎佢！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
