【A&M Diary】我哋兩個好少食西餐，但次次食西餐都係一啲慶祝嘅活動，所以就嚟到白色情人節，我哋就想据吓扒，輕輕鬆鬆咁Chill吓。A姐話想Chill又想Grill？所以今日嚟到銅鑼灣嘅The Grill Room，提早訂好位，享受我哋嘅二人晚餐。
青蘋果巴馬火腿藜麥杏仁沙律
巴馬火腿嘅份量唔少，帶有鹹鹹哋嘅油香，沙律菜上加入藜麥同杏仁，令口感更豐富，而青蘋果微酸，好清新！
甘筍忌廉湯
忌廉濃郁香滑，加上甘筍後，令湯底更鮮甜，好好味！
燒豬腩肉鹽味焦糖汁配青蘋果沙律
燒豬腩肉最重要當然係脆卜卜嘅皮啦，唔食真係對唔住自己呀，好鬆化呀！而一層肥一層瘦嘅肉，比例啱啱好，好嫩滑好juicy。豬腩肉上鋪上沙律菜，油膩感大減。
葡式香辣燒雞配黑松露薯條
燒雞層皮好薄，所以燒得好香脆，而肉厚身，大大隻，夠晒飽。而雞本身用葡式香辣醃過，所以夠入味，仲好juicy。除咗配上沙律菜，仲有一大兜黑松露薯條，熱辣辣脆卜卜，好抵食。
法式椰奶凍配芒果汁 / 焦糖朱古力蛋糕
套餐除咗一份前菜同一份主菜，仲有一個甜品，今日嘅甜品有法式椰奶凍配芒果汁或焦糖朱古力蛋糕，兩款都好香滑，好好味！
