【A&M Diary】有啲咩比即捉即食嘅海鮮更吸引？就係無限任食即捉即食嘅海鮮囉！今日我哋嚟到位於銅鑼灣智選假日酒店嘅JK Brother’s Gold，餐廳除咗活捉即食嘅海鮮之外，仲有刺身、火鍋、燒烤、串燒、炸物、飲品及甜品等放題任食，淨係任食活捉嘅大頭蝦、牛奶貝、沙白蜆、蟶子就已經超易回本啦！加上餐廳坐得舒服，啱晒一大班朋友嚟gathering啦！
即捉活海鮮
成間餐廳最受歡迎嘅一定係呢幾個魚缸，因為可以即捉嘅活大頭蝦、牛奶貝、沙白蜆、蟶子呀！大頭蝦非常生猛，想捉走嚟走去嘅大頭蝦就要描準目標，用啲力將佢捉起，再放入冰筒冷凍，之後就可以放落火鍋煮熟，活捉嘅大頭蝦肯定新鮮，而且肉質彈牙爽口；至於牛奶貝、沙白蜆同蟶子就肯定易捉，全部都無沙，而且非常鮮甜！除咗活海鮮，餐廳嘅海鮮選擇仲有紐西蘭青口、北海道帆立貝及法國黃金螺，啱晒鍾意食海鮮嘅M佬啦！
魚生刺身
鍾意食魚生嘅，呢度刺身就有挪威三文魚、螺、赤貝、深海墨魚等等，三文魚超有驚喜，估唔到放題質素都唔差，夠晒肥美厚切。除咗刺身仲有手卷、泰式生蝦等選擇！而作為一間韓國餐廳，又點少得醬油鮑魚同醬油蝦呢？醬油蝦超鮮甜超多膏，加上坊間食醬油海鮮一啲都唔平，所以一定要encore幾轉啦！
火鍋、牛板腱、封門柳、牛舌
呢度嘅火鍋湯底總共有11款，而我哋就揀咗韓式雪濃湯鍋，湯底充滿濃郁嘅牛骨香味，淥完活捉嘅海鮮之後，湯底更鮮甜，再適合用嚟淥牛肉啦！肉類選擇有牛板腱、封門柳、牛舌、羊肉、豚肉等等。牛板腱嘅脂肪豐腴，肉味香濃，值得encore；另外，牛舌薄切，同樣充滿豐郁嘅牛肉香味。
自取區
自取區有湯、炸物、燒烤、日式小食、甜品同飲品。瞬間即逝嘅有燒大頭蝦同燒蒜蓉蠔，見到有新貨出就要快手攞喇！至於甜品除咗有自家蛋糕，仲有Movenpick雪糕、日本同韓國雪條、榴槤雪條等等，非常豐富。
