【A&M Diary】近排天氣非常舒服，最啱就係去遠足郊遊，呼吸一吓新鮮空氣啦！今次我哋就嚟到大潭水塘嘅大潭水務文物徑（又名大潭篤水塘），大潭水塘夠晒簡單易行，適合行山初哥同一家大細。大潭水塘內有好多歐洲式石橋、超靚水塘同壯觀水壩。如果秋冬季嚟有紅葉睇；如果大雨過後，仲有機會見到難得一見嘅大潭水塘排洪添！啱晒大家影相打卡，玩足一日！
提提你
1. 由黃泥涌峽起步到大潭水塘（又名大潭篤水塘），沿途係落山石屎斜路，全程5公里，共有10個文物徑資料站牌，步行需要2小時。適合行山初哥同一家大細，但都要量力以為呀
2. 沿路無士多補給站，大家記住自備所需用品。至於洗手間設於起點後15分鐘位置同終點位置
3. 大家記住保持環境清潔，自己垃圾自己帶走，絕對唔可以破壞大自然環境
前往方法
乘坐新巴/城巴6、41A、63、66或76，於黃泥涌水塘公園站落車，往陽明山莊方向行，黃泥涌峽起步點正正喺陽明山莊旁邊。
大潭水塘
包括大潭上水塘、大潭副水塘、大潭中水塘及大潭篤水塘，喺1888年至1917年間分期落成，係香港島食水嘅主要來源，統稱為大潭水塘群。2009年9月18日列為法定古蹟。
陽明山莊起點
陽明山莊旁邊有多個郊遊徑入口，記住唔好去錯，今次目標係大潭水塘（又名大潭篤水塘）嘅大潭水務文物徑。
秋冬限定：紅葉
行咗大約10分鐘，就會見到一個涼亭，抬頭望上去，就會見到楓香樹喇！
整段路程中，最受大家歡迎就係四座石橋，石橋用花崗石建成，以半圓拱形結構，並以多條巨柱承托，真係好有歐洲feel啊！
大潭上水塘
睇完紅葉之後，行大概15分鐘就會去到大潭水塘文物徑嘅第一個景點：大潭上水塘。薄扶林水塘喺1869年落成後，食水仍然供不應求，所以當時港督堅尼地喺1873年提出大潭計劃，選址大潭谷興建香港第二個水塘，而首期工程喺1888年完成，可儲存3億加侖食水，後被名為大潭上水塘，並以石橋同輸水道連接其他道路同水道。
