【A&M Diary】講到香港最靚嘅公屋，又點少得位於大坑嘅勵德邨呢！勵德邨除咗位處豪宅區及名校網之外，部份嘅單位更加坐擁維港煙花景色，此外，勵德邨曾經住咗好多名人，包括林珊珊、林曉峰、林海峰、張國強同李麗珍之外，仲有大家最愛嘅A姐！A姐今日番到嚟，除咗探訪鄰居街坊之外，當然就係嚟打卡啦！
提提你
呢度係居民居住嘅地方，所以閒人免進，就算有朋友或者屋企人喺呢度住，大家都要記住保持安靜
勵德邨
勵德邨嘅命名取自前工務司及香港房屋協會執行委員會委員嘅鄔勵德。勵德邨分為三幢八座，每一幢嘅命名同其他公屋好唔同，因為香港其他公屋都會叫做「勵x樓」、「勵Y樓」等，但呢度就取「勵潔樓」、「德全樓」同「邨榮樓」。其中勵潔樓同德全樓係香港少數以圓柱體設計，外觀睇真係唔似公共屋邨。
勵潔樓、德全樓
以圓柱體設計嘅勵潔樓同德全樓就係今日嘅打卡目的地，但記住呢度係禁止閒人進入嘅打卡熱點呀！熱門嘅打卡地點除咗從地下影上去，可以睇到圓形嘅天空之外，位於大廈嘅頂樓，係一個居民嘅休憩空間，由呢度影落去嘅圓形線條，就有另一番風味。
除咗圓形嘅線條之外，每一層嘅樓梯更會形成一個三角形，係另一個熱門嘅打卡位置。另外，喺頂樓嘅位置，更加睇到無敵嘅維港海景，連全港最高嘅IFC同ICC都一覽無遺，如果遇着放煙花嘅時候，啲居民都會聚集呢度，欣賞佢哋獨有嘅煙花景。
