【A&M Diary】呢啲天氣除咗郊遊，又點少得BBQ呢？講起BBQ就一定會諗起大尾督，今日就踩單車入大尾督BBQ啦！喺大尾督有好多任燒任食嘅燒烤場，其中一間頗有名氣嘅就係巴希雅海灣重慶燒烤。巴希雅海灣重慶燒烤同平時嘅燒烤場好唔同，佢哋會先將食物用串吉好，形成串燒，大家可以好方便咁利用枱上嘅燒烤爐整熟，食得夠晒方便。
嚟巴希雅海灣重慶燒烤記住要預先book枱，因為我哋weekend嚟到，眼見walk-in嘅人好多，排晒長龍，反而有預訂嘅朋友仔就可以優先入場呀！至於嚟巴希雅海灣重慶燒烤場就梗係兩手揈揈，燒烤場已包咗燒烤爐、辣汁、每人2罐指定飲品、一盒海蝦、一盒青口、一盒牛油金菇、香蕉、菠蘿之外，當然仲有任燒任食嘅食物，款式勁多，非常豐富！
海蝦、青口
海蝦同青口預先放入錫紙盒，所以燒嘅時候唔會燒得太乾。不過，由於餐廳並未有免費提供蜜糖同鹽等調味料，如果你有需要，就要額外購買！但我哋就提醒青口唔洗刻意調味都非常鮮甜！
任燒任食選擇
食物嘅種類真係好多，有廚師腸、台式香腸、芝士丸、貢丸、紅腸、鴨胸、司華力腸等丸類之外；肉類選擇有羊架、牛仔骨、雞中翼、雞全翼、牛柳粒、雞肉串、雞扒、豬扒、雞腎、雞軟骨等等；菜類選擇就有生菜、娃娃菜、翠玉瓜、茄子等等！如果嚟到巴希雅海灣重慶燒烤已經好肚餓，喺等緊燒烤食物嘅時候，可以食住燒賣同咖哩魚蛋先！我哋就有以下推介：
推介一：蒜蓉包
呢度嘅食物選擇咁多，但我哋第一樣推介就係蒜蓉包，全因想叫大家記住留肚呀！蒜蓉包輕輕烤烘之後，就已經脆邊鬆化，至於麵包上面就有大量蒜蓉，勁惹味呀！
