韓劇《魷魚遊戲》紅爆全球，成為Netflix史上最高收視劇集，就連湖人球星勒邦占士（LeBron James）、安東尼戴維斯（Anthony Davis）都係粉絲。早前佢哋喺賽後記者會提起《魷魚遊戲》，占士直言不諱表示唔鍾意結局安排，估唔到事後被導演黃東赫串爆反擊，提議佢自己拍一個結局！
導演黃東赫（中）提議占士自己拍一個結局（Photo／AFP）
《魷魚遊戲》第1季結局，講主角「成奇勳」放棄上飛機到美國探望阿女，想再重返遊戲復仇。早前戴維斯喺賽後記者會問占士有無睇過《魷魚遊戲》，占士回應時對結局大呻不滿，期間更激動到爆粗，「有，我睇過，你都睇完喇？我唔鍾意個結局，雖然我知佢係鋪排第2季，但主角點解要落機，佢究竟做乜？」呢段對話隨即引起網民廣傳討論。
湖人球星勒邦占士（左）、安東尼戴維斯（右）都係《魷魚遊戲》粉絲（Photo／AFP）
勒邦占士主演《Space Jam 2》（Photo／AFP）
《魷魚遊戲》導演黃東赫接受英國《衛報》訪問時，被問到對占士意見有咩睇法，佢霸氣反擊話：「大家有無睇《Space Jam 2》？占士好有型，可以講任何佢想講嘅說話。」「好多謝佢有睇《魷魚遊戲》，但我唔會改變結尾，因為呢個係我嘅結局。如果佢有自己想要嘅結局，或者可以自己去拍一套，我睇完之後可能會傳個訊息同佢講『我鍾意成套劇，除咗個結局』。」
《魷魚遊戲》導演黃東赫（Photo／AFP）
占士之後喺Twitter轉發黃東赫回應，留言：「唔係真㗎吓話？我希望唔係。」似乎佢都無諗過導演會有咁大反應。
Photo／AFP、Netflix
