【A&M Diary】九龍城被譽為「小泰國」，因為呢度有唔少由泰國人主理嘅正宗泰國餐廳！自從屯馬線開通之後，多咗好多人嚟九龍城搵食，其中近期人氣大熱，主打任飲任食泰式燒烤同打邊爐嘅九泰泰式燒烤火鍋，更係香港少見，所以我哋就提早book枱，試試九泰泰式燒烤火鍋啦！
Mookata
Mookata即係泰式燒烤火鍋，中間係類似韓燒嘅鐵板，而圍邊嘅就係火鍋。其實呢款泰式燒烤嘅專用鐵鍋，本身係打仗時期嘅士兵煮食用具。好似盾牌嘅鐵板會將燒烤嘅肉汁帶到火鍋湯底，令湯底味道保持濃香。至於九泰泰式燒烤火鍋嘅湯底有三款，分別係清湯、船河湯、冬陰公，我哋就揀咗肉味最濃嘅船河湯。
食材選擇
作為放題嘅餐廳，食物種類選擇係好重要嘅一環，肉類有齊豬、牛、雞、羊，驚喜連牛舌都有！仲有丸類、菜類同粉麵，選擇超過50款！
虎蝦
如果食午市或晚市90分鐘放題，虎蝦則須額外收費，但如果選擇晚市120分鐘放題，虎蝦亦係任叫任食。燒過嘅虎蝦帶有焦香味，蝦肉新鮮彈牙，肉質鮮甜，非常抵食。
美國牛肩胛
如果你個胃唔係太大的話，就梗係要目標為本。所以我哋會推薦呢個美國牛肩胛，牛肉味香濃，食多幾碟都足夠回本。
牛舌
另一個推介嘅食物就係牛舌，我哋推介用燒嘅方法，燒過嘅牛舌肉汁被鎖住，肉質軟腍彈牙仲好有牛嘅香味，肉汁豐富濃厚！
豬頸肉
同樣推介燒豬頸肉，燒嘅過程，將豬頸肉嘅油份迫出，外表脆卜卜，而裏面嘅肉質嫩腍，保持住肉汁，加埋秘製醬汁，非常惹味。
