【A&M Diary】日本超強人氣嘅梅丘壽司の美登利，之所以深受大家歡迎，除咗價錢親民，更因為大部份材料都由豐州市場（前築地市場）直送，從而成為唔少人去東京時必去嘅飯堂。雖然近年無得「返鄉下」，但好彩美登利喺香港都開設過江龍分店，今日我就同M佬去到位於尖沙咀嘅全新分店潮聖，順便試吓三款全新嘅產品。
滿滿三貫（全新產品）
一坐低之後，細味嗰杯味道熟悉嘅熱茶，仲見到美登利推介嘅全新產品，一於款款都叫晒，試吓全新嘅味道啦！其中呢款滿滿三貫就絕對係大家必叫嘅選擇，三款海鮮分別係三文魚籽、吞拿魚蓉同海膽，視覺上已經非常衝擊，啲海鮮好似多到跌晒落嚟，啱晒大家打卡！至於味道上，款款都夠晒新鮮，其中三文魚籽晶瑩剔透，粒粒飽滿口感一流；海膽新鮮有光澤，鮮甜柔滑，甘香清甜；而吞拿魚蓉夠軟綿，油脂豐富，魚味濃郁。
鰈魚裙邊沙律（全新產品）
鰈魚裙邊係我嘅最愛！因為口感非常獨特，肉質爽口而油脂卻非常豐厚，所以魚香十足！平時我就食開鰈魚裙邊嘅壽司，但就估唔到原來配上沙律都非常match。首先，鰈魚裙邊嘅係背鰭同臀鰭之間嘅肉身，物以罕為矜貴，但呢碟鰈魚裙邊沙律嘅鰈魚裙邊份量非常多，有成6片，加上清新嘅沙律菜，中和番鰈魚嘅油膩感。
清新卷（全新產品）
今次呢款卷物由青瓜、黃蘿蔔同牛蒡組成，雖然無咗魚嘅提鮮，但意想唔到原來由蔬菜組成嘅卷物都非常清新，口感爽脆，健康又解膩。
刺身
嚟到美登利又點可以唔食刺身呢？今次我哋就叫咗活北寄貝刺身、活帶子刺身同大吞拿魚腩刺身！首先大推嘅係大吞拿魚腩刺身，魚味濃郁，油香豐富，食嘅時候完全無筋，加上份量有成5片，非常滿足呀！另外活北寄貝同活帶子都非常鮮甜，北寄貝就爽口，而帶子則滑嫩軟綿，讓口感形成強烈對比。
壽司
至於壽司方面，我哋就揀咗油甘魚壽司、火炙魚鰭肉壽司、三文魚壽司、平貝壽司、特級玉子壽司同白象拔蚌壽司，食壽司當然由相對淡口嘅白身魚或貝類開始，再食紅身味濃嘅魚或貝類啦！咁多款式當中，最驚喜係火炙魚鰭肉壽司，魚鰭肉經過火燒，入口充滿魚香，接近入口即融；另外，油甘魚壽司嘅肉身十分肥美，而且肉質好甘甜；白象拔蚌壽司夠爽口，非常滿足！
極上海膽壽司
一定要食呀！海膽係唔少人嘅最愛，嚟到美登利就一定唔可以錯過！海膽份量好多，入口鮮甜，帶有甘香，齒頰留香。
牧丹蝦壽司
牧丹蝦好大隻，蝦頭預先燒過，可以食埋蝦頭嘅精華。至於蝦身鮮甜，非常膠口，係我哋推介嘅選擇。
鰻魚壽司、元祖原條穴子壽司
鰻魚同穴子各有捧場客。雖然兩者好似好相似，但原來鰻魚係淡水魚，穴子就係海水魚。而且鰻魚嘅油脂相對豐富，相反穴子肉質細緻，各有千秋。但唯一相同嘅係，喺美登利食到嘅都係超長嘅大size壽司，絕對滿足。
