【A&M Diary】早幾年因為我成日都要出trip，所以冷落咗A姐同大閘蟹，嚟到今年嘅大閘蟹季節，我唔可以再錯過喇！當我搵緊去邊度食大閘蟹嘅時候，就俾呢個「任食大閘蟹」深深所吸引。今次嚟到位於荔枝角嘅相馬日式火鍋，除咗可以任食大閘蟹，仲有日式火鍋同串燒放題，唔該俾多兩個胃我啦！
大閘蟹
一人一鍋就聽得多，但呢度係一人兩鍋。一人兩鍋？係呀，一個鍋係用嚟打邊爐，而另一個鍋就係用嚟蒸大閘蟹。每個鍋可以放入2隻大閘蟹，店員提醒，每次約蒸20分鐘就得，如果你主力想食大閘蟹，每次差唔多熟就盡快落order叫下一round喇！
咁唔知你哋食大閘蟹鍾意食公定乸呢？有啲人話乸多黃啲，但有啲人就話公會甜啲，真係各有市場。其實大閘蟹乸嘅蟹黃主要係卵巢同卵細胞，食落有一種沙沙嘅顆粒感，有啲似鹹蛋黃嘅質感同味道；而相馬日式火鍋提供嘅大閘蟹就係我哋最鍾意嘅公呀！公蟹係唔會有蟹黃，只有蟹膏，而蟹膏係精囊同精液，我哋就好鍾意蟹膏嘅細膩同綿密，濃郁嘅蟹味真係非常吸引。另一重點當然係蟹肉，肉都幾扎實，好鮮甜。
串燒
等緊大閘蟹嘅時候，可以叫啲串燒食住等。串燒選擇唔少，我哋只係叫咗雞翼同少少串燒，唔敢食太多，要留肚食大閘蟹呀！
火鍋
一人兩鍋嘅另一個鍋就係用嚟打邊爐，湯底選擇好多，我哋就分別揀咗廣島蠔土手鍋同伊勢海老湯底。伊勢海老湯底嘅湯好香蝦味，非常濃郁。任食嘅選擇好多，喺自取區有唔少蔬菜、丸同菇類。
海鮮拼盤
海鮮係值得大家encore嘅項目，拼盤有蜆、蠔、蝦、帶子同帆立貝，啲蜆粒粒都好大隻又鮮甜！至於蝦勁新鮮又好彈牙，鮮甜度十足。
美國頂級牛小排、日本鹿兒島頂級黑豚
肉類方面有牛、豬同雞嘅選擇。如果你係大食嘅朋友，就要預留位置食美國頂級牛小排喇，牛肉嘅肉味香濃，肥瘦度適中，唔錯㗎！
