【A&M Diary】身為包包面界KOL嘅A姐，除咗塊面越嚟越包（我今晚肯定要跪玻璃）之外，佢亦都好鍾意食熱辣辣新鮮出爐嘅烘焙㗎！今日嚟到尖沙咀嘅Rise by Classified，呢度除咗包、酥、批之外，亦有打卡推介嘅牛角包窩夫，配埋杯咖啡或奶昔，自製一個歐陸風嘅brunch！
蝴蝶酥
呢件蝴蝶酥真係夠晒大件，牛油味香濃，更重要係選用低糖配方，入口香酥鬆脆，又唔會太甜。
朱古力甜酥麵包、法式雞肉鹹批
除咗酥之外，我哋亦叫咗一鹹一甜嘅選擇。朱古力甜酥麵包嘅酥皮層次分明，入邊有濃郁嘅朱古力餡，香甜又鬆脆；至於鹹點方面，就揀咗法式雞肉鹹批，食之前可以叫店員幫手加熱，雞肉份量好多，食嘅時候好有口感，而批入面除咗雞之外，醬汁主要由蛋同奶製成，蛋香十足，好creamy。
士多啤梨牛角包窩夫
今次嚟到Rise by Classified，主要就係試呢到嘅打卡擔當：牛角包窩夫！牛角包窩夫即叫即熱壓，非常酥脆，帶有濃郁嘅牛油香。上面放有新鮮嘅士多啤梨，加上蜜糖同旁邊嘅忌廉，絕對係少女心嘅推介。
朱古力香蕉牛角包窩夫
除咗少女心嘅士多啤梨牛角包窩夫，仲有呢個朱古力香蕉牛角包窩夫，朱古力醬加上焦糖同香蕉，整體嚟講唔會太甜。
香蕉朱古力花生醬冰沙
嘩！好好飲呀！用上朱古力、香蕉、花生醬、蜜糖、燕麥奶製作，質感厚實，味道好有層次，朱古力嘅香甜，加上花生醬嘅鹹香，味蕾多重享受，雖然好有罪惡感，但真係好好味！
