【A&M Diary】M佬今日突然同我講，佢好掛住去BBQ燒嘢食呀！不過，嚟到夏天A姐確實，熱！到！不！行！了！但你話如果可以嘆住冷氣，有人燒埋俾你食，咁我又唔驅呀！怕熱但又想食BBQ，其實一啲都唔矛盾。今日M佬就帶我嚟到觀塘嘅歡喜燒，食自動串燒放題，嘆住冷氣享受燒烤嘅味道，好滿足呀！
串燒
呢度嘅串燒選擇超過30款：包括雞肉、雞翼、羊肉、牛舌、一口牛、叉燒、腩肉、雞腎、雞軟骨、菠蘿、脆肉瓜、萵筍、粟米、丸類、紅腸、廚師腸、蒜蓉包、棉花糖等。攞完嘢食之後，只要將串燒放上爐，佢就會好有規律咁旋轉，除咗夠晒方便，燒出嚟嘅食物亦都非常均勻。
我哋encore再encore嘅五大推介有：
牛舌 – 厚切嘅牛舌經過燒烤之後，讓肉汁被鎖住，好有口感，牛嘅肉汁豐富濃厚
腩肉 – 一層肥一層瘦嘅腩肉經過細火慢烤，將啲肥油迫晒出嚟，食嘅時候無咁大罪惡感，但仍可食到腩肉嘅juicy
雞腎 – 非常爽口
叉燒 – 超入味，又夠軟腍
蒜蓉包 – 燒到脆卜卜，帶有濃郁嘅蒜蓉香味
呢度嘅最大賣點係大部份食物都無經過預先醃製，但枱上放有日式蜜糖醬、馬來沙嗲醬、泰式辣醬、辣味孜然粉、孜然粉同自家製香辣粉，無論想食重口味，定係好似我哋鍾意淡口味嘅，都可以自行調味。
小食、熟食
係等緊串燒燒熟嘅時候，可以去到熟食自取區醫吓肚先。今日嘅熟食選擇有四樣，分別係蒜蓉炒西蘭花、咖喱魚蛋、蒜香雞翼同青口。至於小食就有芝麻八爪魚、中華沙律、蒜味螺肉、泰式鳳爪，全部都放喺雪櫃入邊，夠晒衛生。
Order紙
除咗自取區，呢度嘅order紙嘢食即叫即做。想食菜嘅朋友，今日就有蠔油菜心苗、蒜蓉炒生菜同腐乳通菜，邊個話食串燒就淨係食肉㗎？另外仲有炸蝦天婦羅同炸蠔等10幾款熟食，不過就略嫌炸蠔嘅炸粉太厚喇。
另外，餐廳亦會每人送上一份茄子，茄子上面鋪滿炸蒜等香料，食嘅時候好香好好味。
