【A&M Diary】講到每日最開心嘅時刻，又點少得搭正6點準時放工呢！放工之後就梗係要搵間好味嘅餐廳，同M佬享受繁忙工作後嘅二人時光啦！喺公司附近嘅Flames就係一個唔錯嘅選擇，餐廳主打烤雞，雖然Flames只有户外位置，但食物質素高，值得推介。
蒜香蝦球
小食叫咗蒜香蝦球，蝦球分量超多，全部預先剝殼，食嘅時候非常方便。蝦肉色澤紅潤，新鮮彈牙，而味道蒜香味濃郁，加上香草，好有層次。
炭燒香草雞釀麵包糠（半隻）
Flames嘅招牌當然係烤雞！呢度嘅烤雞有兩款口味，今日就叫咗炭燒香草雞釀麵包糠。半隻雞斬半上枱，分為上身同下身。雞皮烤到香脆，而雞肉仍然嫩滑juicy。雞肉以簡單嘅香草釀製，帶有微微嘅焦香味，點埋燒汁一齊食，味道非常豐富。至於配菜嘅薯條都唔簡單，分量非常多，而且預先加入店家秘製嘅調味鹽，薯條非常香脆，鹹鹹地非常惹味，連茄汁都唔使落。
10安士肉眼扒配薯條
平時嚟呢度，通常同M佬一人半隻雞，但佢今日話想試吓呢度嘅牛扒，估唔到除咗雞之外，牛扒都好有驚喜。五成熟嘅肉眼，生熟到啱啱好，牛扒只係簡單用鹽同黑椒調味，更突顯牛肉嘅肉汁，牛味濃烈而肉質軟腍，如果想味道提升，可以落埋旁邊嘅黑椒汁。至於配料同樣有店家秘製嘅薯條，夠晒豐富。
