【A&M Diary】旺角作為香港嘅中心點，餐廳選擇好多，不過，高質從來都同旺角有段距離。但位於旺角T.O.P.嘅八木橋日式燒肉，就為大家帶嚟高質燒肉放題，肉類選擇好多，連和牛都係任叫任食呀！呢度嘅放題分為雪丶雲丶霞丶雨四個級別，今日就同A姐試試「霞」，足足有成94樣食材選擇㗎！
放題級別
八木橋日式燒肉嘅放題分為四個選擇，其中有66種食物嘅「雪」同82種食物嘅「雲」，放題時間係90分鐘；而主打和牛就有94種食物嘅「霞」同110種食物嘅「雨」，放題時間係120分鐘。
「霞」頭盤
一坐低，店員就會送上頭盤，4種放題嘅頭盤各有不同，而「霞」嘅頭盤就有濕式•熟成M5和牛西冷、Mozzarella芝士雞腿肉、韓風瓷壺醬油牛肋肉、米澤三元豚肉、鮑魚、味淋魚干、比目魚西京燒同五色刺身盛合。
濕式•熟成M5和牛西冷
西冷預先切開，燒同食都夠晒方便啦！我哋大約燒到7成熟，和牛嘅油脂分布平均，亦無筋，所以食嘅時候接近肉質軟腍，肉味濃郁，好好味！至於呢個濕式•熟成M5和牛西冷更加係「霞」套餐任叫任食，勁易回本。
比目魚西京燒
西京燒超好味！魚肉超滑，調味甜香濃郁，夠晒入味，我哋燒到微燶，加埋焦香，味道更有層次。
味醂魚干
魚干平時只會喺居酒屋食到，今次自己燒，夠晒新鮮創意。我哋燒嘅魚干追求微燶，但又唔可以太乾，燒到啱啱好，煙韌帶甜。
鮑魚
鮑魚超新鮮，燒嘅時候加少少鹽，就更加惹味！鮑魚大大隻，爽口彈牙。
