【A&M Diary】去旅行嘅時候，唔知大家有無試過極限旅遊呢？好似Sky Diving、笨豬跳、激流等等。如果你想尋求刺激或者挑戰自己，其實香港都有唔少選擇。加上近排A姐話行山行到悶，所以我哋就玩吓新嘢，參加咗MAD Adventure HK嘅飛索攀岩放題體驗，全日任攀任飛，瘋狂打卡，夠晒過癮，仲可以盡情大叫，舒緩工作壓力。
提提你
1. 攀岩/飛索有一定危險，參加者必須量力而為，以安全為原則
2. 大家記住保持環境清潔，自己垃圾自己帶走，絕對唔可以破壞大自然環境
石澳大頭洲
香港其實有唔少玩攀岩同飛索嘅熱點，而唔同嘅地點就有唔同嘅難度，今次我哋就嚟到屬於初級程度嘅石澳大頭洲。
安全示範
玩任何活動，特別係極限活動，最重要就梗係安全至上啦！所以開始活動之前，就由Mike Sir示範各項安全設備同注意事項。作為第一次玩攀岩同飛索嘅我哋，真係好緊張呀，好彩Mike Sir非常有耐性，講解有趣，令我哋放鬆唔少，更加享受今日嘅旅程體驗。
空中飛索
嚟到懸崖邊，導師會再次為我哋檢查安全帶同裝備，以確保活動安全進行。另外，因為我哋係第一次玩，所以導師建議第一飛，用踏出一步嘅方式，慢慢飛去對岸。當有咗第一次嘅經驗之後，就可以加速，用跑同跳嘅方法，快速飛去對岸。呢度嘅飛索長度大概50米，唔算太長，適合初級體驗者，而飛索嘅過程唔算太刺激，不過第一次飛嘅時候，行到懸崖邊，都咪話唔驚！最後鼓起勇氣，就飛出去啦！見到嘅風景真係好難忘，海浪氣勢磅礡，懸崖筆直陡峭，所以飛完再飛。
