【A&M Diary】近期跟住香港沙嗲牛肉麵關注組嘅推介，同A姐一齊尋訪香港各區嘅沙嗲牛肉麵，我哋分別去過港島代表嘅上環郁健快餐、九龍西代表嘅荔枝角好好運快餐店、九龍東代表嘅慈雲山榮記茶餐室，唔知你哋又有無去晒各區朝聖呢？今次我哋就嚟到新界西，呢區嘅代表就係位於元朗嘅永順食店，永順食店更加被譽為繼荔枝角好好運快餐店之後嘅另一高質推介。我哋星期六嘅朝早9點嚟到，雖然都有人龍，但因為餐廳座位多，所以唔駛排好耐，大約15分鐘就可以入座，試一試呢間名店嘅沙嗲牛肉麵啦！
沙嗲牛肉麵
呢到嘅麵底以價錢分為福麵、出前一丁同少見嘅蟹皇麵，但我哋覺得，大光麵先係茶餐廳嘅好朋友。沙牛麵一上枱，真係要讚吓店主夠晒大方，沙嗲汁勁多又夠濃，不過花生味就無好好運咁凸出，亦相對無咁鹹。至於牛肉份量夠多，而且大大塊，索晒沙嗲汁，又邪惡又滿足。
豬扒拼雞翼
豬扒同雞翼即叫即炸，夠晒新鮮熱辣！細心位係豬扒預先剪開，夠晒方便，豬扒厚切而且非常juicy。另外，雞翼就中規中距，唔算凸出。
服務
雖然食茶記唔係追求咩服務質素，但元朗國始終係元朗國，職員嘅服務比好好運差得多，而且送餐亦比較混亂，大家要多多包容。
