【A&M Diary】近年酒店好興行精品路線，例如將古蹟同工廠改建成酒店，好有格調，啱晒大家打卡。但原來精品路線亦蔓延去到飲食業，就算你以為簡簡單單嘅一碗牛腩粉，都可以咁精緻，同咁有誠意！講緊嘅係呢間位於灣仔英皇集團中心嘅牛市，店主陳大哥事事親力親為，標榜自家製同絕無味精，品質一流，食得夠晒健康！
坑腩河粉
一上枱第一時間就當然要試試個湯先啦！湯底好有層次，熱辣辣又充滿牛肉香味，聽店主講，佢哋每日用十幾公斤嘅牛骨熬十幾個鐘而成，所以啖啖湯都好鮮甜，牛香味濃。而牛坑腩鮮嫩軟腍，肥瘦度適中。至於河粉夠滑，索晒牛湯，真係好滿足。
咖喱牛腩飯
咖喱帶有椰香味，好有南洋特色，咖喱香濃而不辣，配飯一流！至於牛腩份量唔少，亦有我最鍾意嘅牛筋，煮得入味，好惹味㗎！配菜仲有薯仔同蘿蔔，大大份，夠晒飽肚。
小食拼盤
轉套餐就有小食拼盤，拼盤內有牛展流心蛋。牛展爽口彈牙，特別鍾意佢嘅醬汁，同牛展好match，好好味；而流心蛋嘅蛋香十足，蛋黃香濃。
