【A&M Diary】好多人都鍾意食海鮮,我家嘅M佬都唔例外,海鮮嘅鮮甜味,真係好吸引呀!但邊個話食海鮮就一定貴㗎?今日我哋就要打破呢個定律,嚟到銅鑼灣嘅漁港薈,呢度嘅海鮮蒸鍋好抵食之餘,仲要夠晒新鮮,好生猛架!
無味精靚燉湯
今日嘅燉湯係蟲草花雞腳湯,夠晒足料,而且無味精,飲得出啖啖嘅鮮甜味。
招牌黃金川辣蟹
呢個招牌黃金川辣炒蟹,真係好好好好味!即叫即炒,夠晒鑊氣,而蟹嘅辣味同黃金蛋黃沙比例啱啱好,好惹味。蟹夠晒大隻又勁多肉,蟹殼仲有好多蟹膏,真係食到舐舐脷。
脆皮妙齡乳鴿
除咗海鮮,呢個妙齡乳鴿亦相當唔錯!皮脆肉嫩,脆卜卜真係好有口感,加上少少椒鹽,就更加香口啦!
蒸鍋海鮮拼盤
至於主角當然係蒸鍋嘅海鮮拼盤啦,拼盤以冰鎮上枱,海鮮有生猛波士頓龍蝦、蘇格蘭蟶子皇、北海道大元貝、鮮甜海生蝦同游水海班件,全部海鮮即日新鮮運到,好生猛架!龍蝦大大隻勁多膏,個蟹鉗仲有勁大舊肉;蟶子皇好鮮甜又厚肉;大元貝清潔乾淨,鮮甜彈牙;海蝦超鮮甜;而游水海班件嘅魚肉嫩滑鮮甜,啖啖肉又無骨。
安格斯手切肥牛
牛肉脂肪分布平均,肥瘦適中,牛味香濃嫩滑。
粗糧拼盤
粗糧有紫薯、南瓜、香芋同粟米,雖然話係粗,但其實食落軟綿綿,清甜有益。