【A&M Diary】出晒名鍾意打邊爐嘅我哋，都有唔少私心推介，其中位於銅鑼灣登龍街V Point嘅酒鍋，就係我哋其中一個至愛選擇！酒鍋主打精緻高質打邊爐，湯底用料足而且食材新鮮，呢啲當然係基本嘢啦，而最令我哋驚喜就係呢個維港醉人靚景，坐得又舒服，生日慶祝或周年聚會都好適合，原來打邊爐都可以打得好浪漫㗎！
黃金炸魚皮
依家好多火鍋店都有做黃金炸魚皮，但好多時啲黃金比例都唔太啱，太多嘅鹹蛋黃令未開始打邊爐已經飽咗一半。但酒鍋嘅黃金炸魚皮就好啱我哋嘅口味，炸魚皮表面嘅黃金比例啱啱好，炸到金黃色，口感香脆，熱辣辣，脆卜卜，最重要係食完唔會太膩。
抗疫先鋒
湯底選擇咗抗疫先鋒，一次過試咗4款湯底：藥膳花膠雞湯、杏汁白肺鍋、四川麻辣鍋同蕃茄湯。藥膳花膠雞湯入面有大量花膠，雞湯濃郁，未打邊爐前記住飲番兩碗；杏汁白肺鍋嘅杏仁味香濃，入面仲有木瓜，好滋潤；蕃茄湯嘅湯底濃郁，好鮮甜；而四川麻辣鍋有大量指天椒同花椒，越食越辣，好刺激呀！
頂級安格斯牛小排
牛小排用掛架上枱，賣相一流，呢個細份嘅份量都唔少。其實牛小排係牛嘅前胸肋骨，賣點係油脂均勻，肉味濃郁。
日本頂級黑毛豬豚腩肉
豬豚腩肉嘅豬香味超濃郁，一層肥一層瘦，口感一流。
七星報喜
呢個手打丸有7款口味，分別係：原味、蕃茄、南瓜、甘筍、紫薯、墨汁同菠菜味嘅墨魚丸，每款一粒，所以我同M佬一人一半，試齊唔同嘅味道。墨魚丸夠晒彈牙，最驚喜係紫薯墨魚丸，勁爆多紫薯，甜甜哋，好得意。
黑松露蝦蟹餃
黑松露嘅香味真係好多人都鍾意！餃入面嘅餡料勁豐富，好多蟹肉同蝦肉，好彈牙，口感十足。
開心小企鵝
賣相超得意，好唔忍心將企鵝放入熱湯呀！其實，企鵝即係墨汁墨魚丸，好彈牙，裡面嘅墨魚超多呀！
