【A&M Diary】為何深夜總是餓？餓到瞓唔著，但屋企附近只有24小時牡丹樓，所以M佬話不如揸車入元朗，食深宵限定嘅元朗鬼巴士啦！元朗鬼巴士夜晚11點先開，我哋夜晚10:45嚟到，已經有人龍喇！係咪真係咁好味先？
元朗鬼巴士嘅店主係曾於多部電影擔任臨時演員嘅陳慶航，鬼巴士呢個名就係其中一部佢有參演嘅電影喇。大家要留意，元朗鬼巴士雖然有多間分店，但只有元朗分店係由佢主理，其他分店嘅滷味只係由佢入貨同工場處理。另外，元朗鬼巴士朝早嘅店面係豪大大雞排，要到夜晚先會改為賣滷味嘅鬼巴士。
元朗鬼巴士主要賣潮汕滷味，拼盤價錢分為HK$30、HK$40同HK$50，配料有齊生腸、紅腸、魷魚、雞腎、牛柏葉、豬耳、豬脷、扎肉、雞腳、豬頭肉、豬心等，但每日供應會視乎街市嘅貨品質素，可能會有啲偏差。
我哋今日買咗HK$50拼盤，老闆畀咗大大盒我哋，望見真係覺得好抵食！款款配料都有啲，每一樣食物都好爽口彈牙，特別係生腸同牛柏葉，真係夠晒新鮮爽脆，而且完全冇內臟嘅臭味。不過，每項配料都毫無滷水味，甚至可以話係淡而無味，取勝嘅地方全靠佢嘅甜醬同芥末醬，將味道大大提升！
