【A&M Diary】今個weekend終於等到好天氣，最啱就係同陽光玩遊戲啦！我哋諗住去離島行吓，不過因為估計南丫島同長洲都會好多人，所以今日就帶A姐去啲冷門少少嘅離島，由馬料水碼頭搭船去吉澳，嚟個週末輕遊啦！
吉澳雖然唔屬於禁區範圍，但以前去吉澳只可以由禁區內嘅沙頭角碼頭（需持有禁區通行證）出發或者跟本地團。依家逢星期六、日及公眾假期就可以坐聲威街渡，由馬料水3號碼頭往返吉澳喇！至於票價方面係大小同價，來回HK$90，單程HK$50。
吉澳面積為2.35平方公里，係全香港面積第十大嘅島嶼，但常住人口不足50人。吉澳島嘅島型好似一個反寫嘅「之」字，所以得天獨厚成為漁船嘅天然避風港，故此命名吉澳，取其吉祥之意。
由馬料水碼頭出發，沿路上除咗會經過印洲塘海岸公園，運氣好嘅話，仲會見到香港地質公園嘅地標：鬼手岩。
經過90分鐘嘅航程，就會嚟到吉澳！步出碼頭，行大概1分鐘，就會嚟到吉澳大街。呢度有兩間餐廳、兩間賣茶粿嘅士多同兩間賣海味嘅舖頭。我哋今日無購物checklist，所以行完返嚟先慢慢買，但如果你哋有心水，可以買咗先，因為唔少手作零食係居民每日新鮮製作，貨量唔多，可能行完就賣晒㗎喇！
吉澳廣場
沿住大街，途經警局同民居，大約5分鐘，就會到達一個仿古牌坊，上面寫住「吉澳廣場」。居民嘅大大小小活動，以及每十年一次嘅太平清醮，都會喺呢個廣場進行。廣場內仲有一粒大大粒嘅白色明珠，可以眺望到中國嘅大鵬半島，旁邊仲有一棵姻緣樹，當然，我同A姐就唔洗再求啦！
吉澳地質教育中心
如果想了解岩石同地貌嘅知識，可以嚟到廣場牌坊旁邊嘅吉澳地質教育中心，中心面積唔大，但入面嘅資料都好豐富，包括有岩石、化石仿製品、標本及吉澳文物。部份嘅岩石更可以親手體驗觸感。教育中心嘅鎮店之寶就係由吉澳村民捐贈嘅天后花轎同服飾。
吉澳天后宮
香港以漁港起家，所以漁民都習慣出海前參拜天后娘娘。吉澳天后宮嘅歷史，就要由乾隆廿八年開始講起⋯⋯樑上面嘅陶公仔係光緒六年製作，全部都有眼無珠，據講係因為驚點睛之後會附有生命，而銅鐘上就會見到刻住「乾隆廿八年」，數一數，厚本已經超過250年歷史。
既然嚟到天后宮，仲要睇睇呢對「鬼佬門神」！呢兩個門神點解會畫到成個外國人咁？據講當日有兩個啹喀兵負責翻新廟宇，喺油漆工程嘅時候，將原有嘅門神蓋過咗，所以佢哋憑記憶同想像，再參考對方嘅臉畫上現有嘅門神。所以呢對門神就唔似中國人喇，門神嘅腰帶亦畫到成隻比卡超咁㗎！
益民茶樓
如果時間充足，可以行埋澳背塘徑，俯瞰吉澳全景。但我哋就忍唔住要醫下肚先喇。
呢到嘅柴魚花生粥同白飯係任食嘅，粥帶有淡淡嘅柴魚香，清熱消熱氣真係一流！
手打墨魚丸係益民茶樓嘅名物，清蒸嘅墨魚丸成粒乒乓波咁大。入面勁多墨魚，加上魚肉、豬肉、蔥粒同陳皮粒，夠晒爽口彈牙，而且味道好有層次。（如果想返屋企都回味，可以外賣係一盒墨魚滑，不過，入面無防腐劑，所以買完要快啲食喇！）
