立咗秋個幾月天氣仲係熱辣辣,相信女士們去街街,小背心都走唔甩,想繼續以靚靚身型線條示人,就要跟住星級導師黃詠詩(Czon)做運動喇,只需要準備一件衫同埋一張凳,3招就可以擊退Byebye肉,仲唔快啲跟住做!
第一個動作,需要準備一件衫或者毛巾。左右手捉住衫嘅兩邊,右手手踭指向天。吸氣時,右手向上拉,再放鬆,而左手同時向下出力。每邊大概做5-10下,如果想增加難度,可以每一下拉緊嘅時候,Hold住動作。
第二個動作,需要用到一張凳。凳背靠牆,手掌撐住座位,頭與腳成一直線,手臂拉直,吸氣時曲手。謹記手臂要近貼身體,先可以鍛鍊到Byebye肉。動作做得啱嘅話,腹部會出力,背部亦唔會有任何不適。
第三個動作,仍然需要用到凳,同樣凳背靠牆。坐到靠邊嘅位置,手掌按住座位邊,手臂拉直,挺起胸膛。吸氣時,曲手,身體向下蹲,呼氣時,身體向上升。如果想增加難度,雙腳可踏前少許。謹記手踭指向後,剛開始鍛鍊時做5-10下,之後可以增加到15下。
九月不減肥,十月徒傷悲。每日只要抽10-15分鐘,就可以修緊手臂線條,咁荀嘅嘢,大家唔係唔做呀?記住要持之而恆,先會見到效果㗎!
鳴謝:
導師:Czon Wong
場地供應:Monkey Business