【now.com生活】有日,有位太太嚟到診所,佢行埋嚟登記處~
我:「早晨,係咪登記睇醫生?」
佢斬釘截鐵:「唔係」
係,送客。
佢企喺度左摷右摷,拎出一個純情小白白樽,放喺枱面。
佢:「你睇吓呀?」
我戰戰兢兢好很驚:「咩嚟㗎?」
佢:「藥囉,你驚我俾炸藥你咩?咁驚青」
太太,你又真係有所不知啦,我做咗咁耐,我真係好驚打開啲乜盒乜樽,成日有蟲有屎俾我睇我真係唔係好過癮㗎咋~
我扭開樽蓋望見好多粒白色丸仔:「睇咗~白色嘅」
佢:「咩藥嚟㗎?」
我:「我哋醫生開俾你嘅?」
佢又再斬釘:「唔係」
我想斬甩你粒釘:「你拎返去開藥俾你嘅診所問啦~」
佢:「而家我問你少少嘢都唔得㗎咩?你做生意咁做㗎咩?」
唏唏唏~我重申返有錢收就叫做生意,而且我哋門口冇寫到有『藥丸識別服務』或者『內有藥問大師』~
我:「因為好多藥都差唔多樣嘅,我哋唔可以單憑佢外表就知佢係咩藥,最準確嘅方法就係你去返開藥俾你嘅地方問,而且下次唔好再自己入樽,就算入樽都至少留返個貼紙或藥袋。」
佢:「你鬧我呀?你係咪嫌冇錢收唔肯答我呀?」
佢摷摷袋,掉出一張十蚊紙:「嗱!答啦嘛?」
十蚊答一條關於你生死嘅問題,你真係覺得你值十蚊?
我:「小姐,真係唔係錢嘅問題,係安全問題。」
佢:「你答我點食,係咩藥咪得囉」
我:「啲藥你點得嚟㗎?」
佢:「唔記得啦,我都唔知呢樽係咪我嘅,我個仔啲藥都咁放」
你知道嗎?咁係一個唔好嘅習慣~
我:「你冷靜啲聽我講,你屋企啲藥,如果全部都係入晒樽仔,而你又唔知係咩藥,我建議你最好掉晒佢~之後再睇醫生拎過啲藥啦。唔好再換樽啦」
佢:「你真係好煩,十蚊都唔夠呀?廿蚊夠未呀?」
我:「真係唔係錢嘅問題」
佢:「妖!乜你咁貪心!」
佢拎走樽藥,嬲爆爆咁離開診所⋯⋯
文:寶豬姑娘
(中女珍寶豬,任職診所助護超過十年,經常使用逆向思維參透世事,包括⋯⋯細閱大家姐。)
〈豬事八卦〉逢周三刊登
專欄屬作者個人意見,不代表本網立場