【now.com生活】人到中年,直至今時今日我都仲學習緊點樣做人。
作為子女,要孝順父母;
作為丈夫,要孭起頭家;
作為男人,要承擔責任。
咁,作為一個上司呢?
以前,我會覺得打工仔最重要嘅就係錢。於沙士期間投身社會,見證住大企業有盈餘下裁員,好多人失業搵唔到嘢做,再悲慘嘅有人因為失業冇錢供樓變銀主盤,負資產搞到破產跳樓,悲劇收場。
所以我一直覺得對住公司唔駛講情義,打工仔以自己既勞力去換取應有嘅回報,雙方明買明賣,咁樣先係最簡單嘅僱傭關係。
人,係俾年齡控制思考嘅動物。年青時,要上位想升職加薪就不斷跳槽,希望以最短時間開始獲得最多嘅收入;去到中年,因為家庭開支大,唔敢轉工怕適應唔到新環境,又怕同新上司唔夾過唔到試用期,唔敢跳出Comfort Zone;去到晚年開始知命,升唔到上管理層就代表呢世冇得升,轉工又因為年紀大而冇人請,所以一動不如一靜。
錢好重要,但原來工作做得開唔開心,都一樣咁重要。
女兒大得好快,而家已經大概聽得明我講乜,最近開始教佢紀律,每完成一次之後我都會讚佢叻女,咁下次佢就會做得再好啲俾我睇。從中我得到一點啟發,就係對上一次我讚人究竟係幾時?
職場社會有一個通病,就係下屬完成佢嘅任務係必然,完成唔到就係下屬嘅問題,上司批評下屬做錯嘢,但好少諗下屬其實已經盡力做啱咗九成。
同一個道理,枱面有半杯水,而家嘅你係諗「搞錯!點解俾半杯水我?」定係「太好啦!我有半杯水飲!」
呢個問題,作為一個管理層,值得深思。
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
〈不是庸材〉每隔周四刊登
專欄屬作者個人意見,不代表本網立場。