【now.com生活】「喂，阿強你今次真係做得好差喎。」
「係囉，隔籬Team阿強瀨晒嘢啦今次，超唔掂囉佢。」
「咁多個同學，最霉都算係阿強啦！哈哈！」
面對俾人踩低，阿強好冷靜，行埋去講一句：
「踩低我，係咪代表你會高咗？」
全場靜晒。
啱呀，根本冇人可以反駁到。
個個人都懶，唔想做太多，但又唔想做最差嗰個，咁點呀？
咁咪推一個人出嚟，做「最差」嘅代表囉！
哇，我搵15000一個月，阿強搵13000，即時放心晒啦！
喺公司，阿明立咗大功，我係有啲驚呀，好在阿強闖咗禍！咁我喺中間，Everything is under control呀！
其實一直以嚟，好多人只係搵一個「比自己差」嘅人自我安慰，等自己Hea得安心、廢得合情合理。
但慢慢佢哋直情入咗魔，錯覺「你差咗」，等於「我好咗」。
喂，呢個世界邊有不勞而獲㗎！
踩低人，其實係抬唔高自己㗎！
好簡單，你15000，阿強13000，你點笑佢，你點喺佢身上搵優越感，你點話佢廢，你都係15000，唔會因為你笑足佢十日，之後你變17000。
唔好搞錯，唔好將世界睇得太冇智商。
同埋，批評係好容易，但你不斷話人錯，唔代表你啱咗。
但錯咗嘅人總會Gain experience，佢只要敢衝落去，總會翻身。
所以，咩都話「唔可以冒險」嘅人，永遠只可以企喺批評嘅位置，
因為呢個位置最安全，不過佢唔會有咩成功。
所謂成功，都存在風險，
所謂大人物，就係喺唔同風險之下破浪而生。
不費力行上去，只有隨流水，向低流。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
