【now.com生活】人生在世,好多事情都係身不由己,特別係做咗打工仔之後,呢個感受更加深。
職場社會,打工仔每一日都喺戰場裡面搏鬥,要對付蠻不講理,將歪理講成道理嘅客人;要低聲下氣,委曲求全去求其他部門嘅同事幫手解決問題;仲有要扭盡六壬去同同事打好關係,不求融洽,但求唔好俾人排擠自己。
以為咁樣叫慘?未算,有時候估老闆或者上司諗乜呢下先叫做慘。
好多上司老闆成日話自己開明,會聆聽同分析同事嘅意見,但實情係話自己開明嘅人,通常都唔太開明。
「呢件事你點睇?」呢個問題大家聽完要小心回答,冇意見代表冇主見,即係代表問你都多餘,你答嘅意見唔係佢心裡面嘅意見,亦代表你嘅思維去唔到佢嘅層次,冇能力亦都冇資格年底升職加薪。
悲劇。
曾經,我都陷入過呢種困局。
做物業管理呢個行業,經理去到前線同事流失率都好高,行內俗稱「爛盤」嘅屋苑更加係人見人怕,基本上畀你升職加薪過去都唔會做得長,所以「爛盤」一般冇人去做亦唔會想做,除非你諗住挑戰自己,搏之後更進一步。
上司曾經問我意見,問我有冇興趣調去一個「爛盤」到做,仲同我分析成件調過去之後對我嘅將來前途有乜幫助。我唔係一個上進嘅人,要我做到七十一咁先賺多少少錢,我情願人工少啲去陪下屋企人,選擇活在當下。
諗咗一個唔錯嘅理由拒絕上司,點知過咗一排,上司就放風同人講話我有經驗有能力但係冇上進心,仲話本來想好好咁栽培我,點知我選擇自我放棄。聽到呢度,我已經知所謂嘅風根本上就係上司嘅口訊。
做打工仔好簡單,上司老闆叫乜我哋就做,我哋有能力有責任心,但唔代表打工仔知道上司老闆諗緊乜。
你要調我,我咪俾你調囉,搞咁多花臣做乜?
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場。