【now.com生活】有日，電話響起。
一位男士：「喂？」
我：「你好，乜乜診所！」
佢：「我晏啲有個老竇嚟睇醫生呀！」
有個？孩子，你生活得好辛苦啊，要面對好多個老豆吧⋯⋯
我：「哦？好呀，𠵱家至到十二點半都可以嚟睇醫生！」
佢：「你哋幾點射到個人上嚟接佢走？」
吓？我：「我哋冇出診服務啊！」
佢：「出咩疹呀，佢感冒咋喎！」
我：「我意思係唔會有醫生有姑娘去接你爸爸啊，你要帶佢嚟呀！」
佢：「我Well paid for it㗎喎，點解冇呀？」
我：「啊⋯⋯我哋冇呢個服務，亦冇呢個人手可以安排到啊！」
佢：「我冇畀錢你哋咩？我係乜乜乜，覆診卡號碼係乜乜乜乜，你睇吓我睇咗幾多次先出聲，畀啲實質嘅答案我好冇？」
我好飄渺咩，我好虛幻咩，要唔要打你一拳先叫實質啊？我準備好呀，你嚟拎實質之拳啦！
我：「先生，我哋冇呢個服務啊！」
佢：「妖！」
嘟。佢收咗我線。
大家姐問我：「咩事呀？」
我：「有位睇開嘅病人想我哋去接佢老豆嚟睇醫生⋯⋯」
大家姐：「仔定女，靚唔靚仔？」
我：「⋯⋯老豆應該係仔嚟，我唔知佢靚唔靚仔喎⋯⋯」
大家姐：「睇開嗰個病人呀！」
我：「⋯⋯唔記得⋯⋯」
大家姐：「唔記得即係唔靚仔啦，靚仔嘅你一定記得好清楚！咁唔駛理佢啦！下次有靚仔先話我知啦，我好得閒！」
明明記得靚仔嘅唔係我⋯⋯
文：寶豬姑娘
（中女珍寶豬，任職診所助護超過十年，經常使用逆向思維參透世事，包括……細閱大家姐。）
FB：https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場
