【now.com生活】有日，同事射咗波，我要兼顧登記加執藥位～一個媽媽拖住個七八歲仔嚟到診所。
媽媽行埋嚟登記處嗌入藥房：「姑娘，姑娘，我睇！」
我行返出嚟：「好呀，麻煩你身分證呀～」
登記後，我叫佢坐低等等，不過佢好似冇興趣理我⋯⋯繼續企喺度。我冇理到佢就行返入藥房繼續做嘢～
隔咗陣我聽到喺岀面嘅媽媽大嗌：「你再係咁！我唔要你呀！」
仍然係得媽媽嘅聲：「我唔要你啦！你自己執生啦！」
之後靜了。到我行返岀去，我見到阿仔一個坐咗喺度⋯⋯
阿仔望住我：「姨姨，你有冇電話？」
我拎起診所電話：「哦？有呀～你打畀你媽咪呀？」
阿仔：「唔係呀，我想玩電話⋯⋯」
我：「吓？冇喎⋯⋯我打畀你媽咪先呀～」
阿仔：「姨姨呀？」
我邊打電話邊回應佢：「嗯？做乜呀？」
阿仔：「你要唔要我呀？」
我：「⋯⋯」
阿仔：「我可以認你做媽咪㗎！」
電話通了。
我：「喂？小姐？我係乜乜診所打嚟～你去咗邊呀？睇得醫生㗎啦，仲有你個小朋友仲喺診所⋯⋯」
媽：「我唔睇啦！」
我：「唔睇嘅我可以幫你取消，但係小朋友都要帶返走⋯⋯」
媽：「佢唔係我個仔啦喎！」
⋯⋯你哋可唔可以唔好搵我做磨心。
我：「有乜事都返嚟診所先，留低個小朋友喺度唔好嘅，你返咗嚟先。」
媽：「你唔駛勸我啦，我決定咗唔要佢㗎啦！你要咗佢囉！」
你哋兩母子其實係嚟玩我嘅？鏡頭喺邊？我要唔要表情誇張啲？
我：「咁⋯⋯我唯有報警啦。」
媽：「我𠵱家返嚟，我就喺對面街，好快！」
我：「非常好！」
收線後，我同仔講：「你媽咪𠵱家返緊嚟，你唔駛驚呀！」
阿仔一臉從容：「我從來冇驚過，係得你驚啫！」
⋯⋯我唔想做未婚媽媽嘛。
文：寶豬姑娘
（中女珍寶豬，任職診所助護超過十年，經常使用逆向思維參透世事，包括……細閱大家姐。）
FB：https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場
