【now.com生活】我阿爸係電影迷，喺我細個嘅時候，佢已經帶我去租帶舖借錄影帶返屋企睇。
記得嗰時，我仲係小朋友，對動畫特別大興趣，去到租帶舖，只會叫阿爸租《龍珠》、《超時空要塞》，尚未懂得欣賞電影，直至年紀漸大，就開始靜靜坐喺客廳，同阿爸一齊睇電影。佢鍾意睇功夫片，所以當年睇得比較多嘅，都係洪金寶、林正英、成龍、李小龍等等金牌武打演員嘅戲。
直至升咗中學，錄影帶時代末落，我又開始同男校嘅巴打齊齊睇周星馳嘅喜劇。星爺嘅戲，我統統睇過不下五次，雖然我未如100毛嘅同事咁叻，可以將佢講過嘅對白倒背如流，但聽到嘅時候，一定記得係邊一幕。不過對我影響最深嘅，其實係王家衛導演嘅電影。
記得有一年，我嘅心儀對象同朋友們去咗飲酒，我Send咗個訊息畀佢，佢冇回我，徹夜難眠，唯有打開電視默默等待。當時電視播嘅，就係王家衛嘅《東邪西毒》。初初望見個名，以為同一般嘅金庸小說電影版一樣，打嚟打去，點知睇落先知，原來係文藝片，而戲中嘅對白，同我當時心情不謀而合。林青霞飾演嘅慕容嫣因為梁家輝飾演嘅東邪唔喜歡佢，搞到去搵張國榮飾演嘅西毒去殺佢，佢有一句對白是咁的︰「如果有一日我忍唔住問你，你一定要呃我，就算你個心幾唔願意，你都唔好話畀我聽，你最鍾意嘅人唔係我。」睇到我差啲流馬尿。
有段時間，我經常睇外國電影，馬田史高西斯、昆頓塔倫天奴、奧利華史東、史丹利寇比力克等大導演嘅戲，我都睇過。冇錯，佢哋嘅電影，大部分係佳作，但我都係比較鍾意港產片，因為聽到演員用廣東話講出深情嘅獨白時，就好似有人直接讀出我心裡面嘅感受一樣，呢種心情同親切感，係其他語言嘅電影無法取代的。
獨的格言︰失戀嘅時候要睇喜劇，因為如果想睇慘情戲，照鏡就得。
文：專家Dickson
（小弟毛記電視專家Dickson，至今追女仍然食塵。見到女神自覺好襯，幻想世界感覺好親，點知佢話我有病要求診，搞到我傷心要把情史……痛陳。同道中人聽完打冷震，覺得好Pure又好真，自此執筆去行文，篇篇酸爆篇篇甘。）
FB：https://www.facebook.com/expertdickson
〈獨的酸言〉逢周一刊登
專欄屬作者個人意見，不代表本網立場
