【now.com】或者你喺工作上畀人嘅感覺係平易近人;
畀人屈都可以笑笑口;
捱OT亦冇甚怨言。
但係,聖人都有錯,
所以你其實都有脾氣。
只不過,呢個出氣袋唔係叫「同事」;而係叫「死黨」。
喺社會上,你總試過喺一個「唔適當嘅場合」發過脾氣,
然後由旁人目光,佢哋嘅竊竊私語,你明白到有啲地方,並包容唔到你嘅情感。
既然係咁,你就選擇隱藏。將「憤怒」呢個感情石沉大海。
當見到班死黨,呢個咒術先可以解封。
你都唔自覺,明明同呢班人最熟,偏偏最多拗撬。
去次燒嘢食可以拗。
「咁真係邊個買嘢食呀?本身又話你買,呢家又縮,唔X好去啦!取消啦X你 。」
去次旅行可以拗。
「唔去嗰度啦!啲白痴先去,又逼又冇嘢睇。咁分兩班人囉,各有各玩,咪X嘈!」
打次機都可以拗。
「你嚟得咁遲,輸X硬啦呢家,又累輸,勁X廢。你以後唔好打機啦。」
往往此言一出,就會引發世界大戰。
有次我都會嘗試喺中間調停,唔想佢哋成為仇敵。
言而,每次都會得到以下答覆:
「得啦,過兩日冇嘢架啦。」
最後你發現,呢句係假嘅,根本唔使過兩日,過兩粒鐘已經冇事。
其實你發完脾氣,都會反思,點解公司班陰濕小人,我都忍到;但呢班老死,反而忍唔到。
因為每個人都害怕失去,公司同事嘅關係纖細如絲,一觸即斷;
而死黨嘅羈絆,互相糾纏,一兩句粗口絕對動搖唔到雙方關係。
正正係咁,佢先可以肆無忌憚咁對你發脾氣。
其實喺佢心底,暗暗係覺得唔會失去你。
至少,知道你會包容到佢嘅各種直性情。
文:張晨
FB: https://www.facebook.com/birdnoup
〈都市無情〉每隔周四刊登
專欄屬作者個人意見,不代表本網立場。