【now.com】就喺噚日，只不過係噚日……發生咗一件可能會令我惹官非嘅事。
噚日，有位姨姨嚟到診所登記睇醫生。由佢入門口嗰時，我已經好留意佢，因為佢腳步浮浮，好似行得唔係咁穩同踏實。
佢：「我想睇醫生呀」
我：「好呀，有冇帶覆診卡或者身分證？」
佢身軀左搖右搖咁摷手袋：「有呀，等陣呀，我搵搵呀」
我：「你坐低慢慢搵呀，搵到話我知呀，唔駛急～」
佢又腳步浮浮咁行去坐低。
到佢搵到身分證時，佢：「姑娘，我搵到啦」
我急急腳行岀去：「得～你坐喺度，我岀嚟拎得啦」
登記後，睇埋醫生，診斷係感冒。
到執完藥準備出藥，心急拎藥嘅姨姨已經企咗喺度等……
我見同事去咗跟症，就由我岀埋藥啦～
我：「啲藥攞得㗎啦」
我：「呢啲每日四次，每次食一粒⋯⋯」
邊聽我講解邊摷銀包準備俾錢嘅姨姨搖搖欲墜了！佢想向後跌了！
嚇得我即刻伸手橫跨佢肩膊，托住佢膊頭⋯
時間好似靜止了，世界好安靜，聽到姨姨嘅呼吸聲……
我望姨姨，姨姨又望住我。
姨姨再快速彈開：「咦呀！」
我：「小心呀～」
姨姨眼神中帶點恐慌失措，偷望中又帶幾眼迴避……
我繼續講解啲藥點食，佢都好似心不在焉咁又間中偷望我。
直到佢離開，佢都冇同我講過任何嘢……
之後醫生問我：「你做乜攬住佢呀？」
我：「我見到佢就跌咁嘛」
醫生：「我喺閉路電視望到佢用左腳R緊右腳咋喎，之後你就攬住人啦，邊有跌呀？」
⋯⋯我非禮咗姨姨⋯⋯
文：寶豬姑娘
FB：https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場。
