【now.com】每個人都有自己嘅處事手法,有啲人比較按步就班,有啲就比較天馬行空。或者你覺得我做創作,應該屬於後者,但其實我係做事講程序嘅機械男。
基於細個打RPG Game上腦,我一直覺得每件事本身都係個Mission,既然係Mission,一定有特定方法過關爆機,只要搵啱方法,問題就唔再係問題,迎刃而解,亦因為咁,我做事前,通常會問清楚方法同細節。每當人哋要我做啲唔知方法嘅事,我就會覺得冇安全感,覺得無論點做,只會落得失敗下場,純粹失敗還好,最驚係出醜,貽笑大方。
未做《100毛》編輯前,我曾經喺一間製作公司打工,有次要跟老闆出外見客,就坐佢架靚靚七人車出去。我咁大個仔,甚少坐私家車,所以對車門開關嘅認知,只停留喺的士嗰款。一見到車門嘅把手唔同咗,我當堂陷入驚慌狀態,全程車喺度諗︰究竟度門點開?開唔到會唔會畀人鬧?會唔會整壞老細架靚車?點算?
最後,一停車,我戰戰競競去拉度門,果然,無論我點拉點扯,都開唔到門,老細見我咁,立即同我講︰「搞咩呀?唔好扯壞呀!輕輕拉一下,度門咪自動開囉。」然後示範畀我睇。原來,開門係不費吹灰之力的。從此,我「騰雞」呢個性格,成為前老闆對我嘅唯一看法。
情場上一樣如此,我努力喺挫敗中尋找正確嘅方法,試過睇坊間教人求愛嘅書籍,又試過問朋友,然後跟住學習回來嘅方法去做,結果當然係瀨嘢。慢慢,我就領悟,有啲方法,可能只適合某君,例如好似吳彥祖咁靚仔,當然可以壁咚,如果我學佢,恐怕換來嘅只有兩巴掌,又或者一次上差館嘅機會。
發現呢個事實,我決定做返自己,從自己嘅失敗經驗,推敲屬於自己嘅方法,雖然未必成功,但卻有一種舒適感。
獨的格言︰工作盲摸摸亂咁摸,隨時撞大板;愛情盲摸摸亂咁摸,隨時衰非禮。
文:專家Dickson
(小弟毛記電視專家Dickson,至今追女仍然食塵。見到女神自覺好襯,幻想世界感覺好親,點知佢話我有病要求診,搞到我傷心要把情史……痛陳。同道中人聽完打冷震,覺得好Pure又好真,自此執筆去行文,篇篇酸爆篇篇甘。)
FB: https://www.facebook.com/expertdickson
〈獨的酸言〉逢周一刊登
專欄屬作者個人意見,不代表本網立場。