【now.com】我唔聰明,但唔代表我係一個蠢人。
人越大,越發覺現實社會嘅醜惡。細個讀書,隔籬個同學仔同你講今次考試冇溫書,話今次一定唔合格,點知最後佢八十幾九十分,之後仲入埋精英班;踢波時候,遇上不良青年,個個踢人唔踢波,不幸地,隊友俾人踢傷,諗住義氣仔女上前幫隊友理論,點知講嘅時候,自己俾人打到豬頭咁,其他隊友就走夾唔抖搭的士走先,獨留自己孤軍作戰。
悲劇。
所以,我細細個就唔再信人,我情願築起一道牆保護自己,我唔攞個心出嚟交朋友,對方亦唔駛當我知己,簡單嘅關係就最好。就算信,我都一定經過一段長時間嘅觀察,確保對方唔係一個會出賣朋友嘅人,所以喺我生命裡面,朋友其實冇幾多個。
不過,出到嚟職場社會,少不免要帶住一個假面具做人,有啲識咗冇耐嘅人會同你稱兄道弟,有啲人就冇料扮四條,明明咩都唔識又要扮到自己咩都運籌帷幄,點都好,對我冇傷害嘅話,我有時候都係當睇馬騮戲,不值一提。
只係,職場上面有啲人特別乞我憎。早前有個行家話有好嘢益我,話佢公司有一批優質嘅光管可以市價五折賣俾我,我聽完都覺得有點心動,因為咁做可以折省屋苑嘅開支,喺財政緊拙嘅情況下,價錢的確吸引。行家仲話同我識咗咁多年,當我兄弟先幫我,今次叫做半賣半送,擺明益兄弟。
「兄弟」兩個字,真係好兇險,聽完唔止反胃,更加令人想嘔。再三打聽之後,發現所謂嘅光管其實係行家落錯order訂錯貨,所以有大批貨屯積喺度,因為出唔到數,而要四圍搵人填數。
其實一開始,佢同我講話自己有鑊要我幫手,我真係會諗下方法幫佢,但原來發現講咁多冠冕堂皇嘅說話背後,其實只係想搵一啲傻仔出去幫佢填數。
細個阿爸教落,做人千萬唔好怕蝕底,要抵得諗,咁人哋先會俾機會。我同意,但唔該唔好講到好似帶挈我同幫我咁,咁做只會令我覺得你更乞人憎!
我唔叻,但唔蠢,唔好搵我笨!
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場