【now.com】人到中年,好多事情都睇得好開好化。
細個出來社會做事,遇過一啲冇料扮四條嘅經理,持住自己有多少少權力就欺壓下屬,十幾年過去因能力見底,事業走進低谷,冇份工做得長久;亦曾遇過一啲不問世事嘅經理,佢嘅貢獻就係冇貢獻,?家事業卻係更上一層樓;又有啲上司能力冇問題,有承擔有擔戴,深得同事愛戴,卻總被高層忽略而停滯不前,屈屈不得志。
做打工仔好多時候都係身不由己,以為自己勤力盡責就有機會升職加薪,點知升職係另有其人;以為轉工可以轉換環境,誰知係另一個無間地獄。
「際遇」就好似經濟學嘅Demand and Supply咁,兩條線交叉疊住嗰一點先可以真正發揮到佢嘅作用。好多打工仔慨嘆自己有能力,有遠瞻卻懷才不遇,而我嘅人生經驗卻可以話你知,即使有運,冇料亦都冇用。
我有一個舊同事,剛認識佢嘅時候已經知佢非池中物,佢聰明記性好、轉數快、學歷夠,基本上呢一類人去到邊都必定會成功。年青時候嘅佢,運氣唔係幾好,好幾次都因為公司架構重組,又或者因為辦公室政治而令到升職被推倒,事業停滯不前。
我曾經以為佢會鬱結或者唔開心,誰知佢嘅人生態度卻認為不如意嘅事只係磨練,如果咁小嘅事就被困擾,將來根本就成唔到大事。佢嘅說話唔係咩大道理,但當時嘅我聽到簡直係如雷貫耳,對佢堅強意志深感佩服。
?家嘅我仲係一個卑微嘅物業經理,相反,佢已經係區域經理,比我走得更快更遠。
人生,好多時候都充滿困惑,被好多不如意嘅事困擾。我曾經都有一刻糾結,問自己差唔多十年冇升過職,係咪成世人碌碌無為咁就完結,常問自己幾時先可以喺事業上面更進一步。
後來,我終於知道,際遇呢回事根本上就唔到自己控制,既然控制唔到又駛乜咁在意?相反,我質問自己,運氣來到嘅時候,自己有冇能力去好好把握。
一年之計在於雙糧之後,打工仔轉工或者留低都好,問一問自己,下一分鐘運氣來到嘅話,自己有冇能力把握。
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場