【now.com】我一直都唔太喜歡Team Work呢個字，特別係出自不食人間煙火嘅高級管理層口中，更加令人覺得反感。
必需承認，我係一隻野馬，要馴服我並唔容易。令我心服口服嘅上司冇太多個，可能自己工作嘅行業問題，認識到嘅上司大多都只當下屬係一隻棋，收到投訴就出警告信，將同事調盤就當係一個交代處理，根本從來就冇尊重過下屬。
我唔怪佢哋，因為我細細個就了解到一個道理，人生去到任何重要關頭，可以依靠或者依賴嘅就只有自己，其他人根本就唔會理自己死活。
管理層成日都同公司嘅同事講Team Work，話只要上下一心就唔會有解決唔到嘅事，而管理層亦都會舉辦多啲員工活動，培訓或者係球類比賽去加強同事之間嘅凝聚力，當時嘅同事個個都聽到熱淚盈眶，以為自己喺公司入面並唔係一顆普通嘅齒輪，而係有價值嘅資產。
點知，公司嘅第一個活動就係請同事食自助餐，同事滿心歡喜，點知參與嘅員工就只限總寫字樓嘅同事，其他駐大廈屋苑嘅同事就冇份參與。同事見到個個都媽聲四起，問點解大家都係公司職員，待遇同總寫字樓嘅同事差咁遠。
「冇計啦！一間公司成千人，邊有可能個個都有份去？」
我同意呢個講法，但稍有少少智慧嘅人都會諗到，其實只要以「抽獎」形式選出員工出席活動，同事覺得自己職位低地位低呢個問題就可以輕易解決。做成今次失誤，關鍵係所謂嘅管理層一開始就冇當駐大廈同事係自己人。
打工仔好現實，要吸引人才留喺公司最重要嘅就係出比市場更高嘅人工同福利，所謂嘅員工活動或者聚會，對打工仔來講只係Bonus，甚或至可有可無。
拜託！唔好再講咩Team Work，Team Spirit或者係Staff Retention，管理層真係想對同事好，想做一點實事嘅話，唔該⋯⋯
加人工啦！
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
FB： https://www.facebook.com/yungchoi2012
〈不是庸材〉每隔周四刊登
專欄屬作者個人意見，不代表本網立場。
