【now.com】有日，一位著住白色菊花牌底衫嘅叔叔行入嚟診所，胸前兩粒釘比佢本人的腰更挺……
佢左望右望，我：「係咪睇醫生呀？」
佢：「你係姑娘呀？」
唔係呀，我係醫生呀，我坐出嚟扮姑娘過吓癮，驚喜唔驚喜呀？你信唔信呀？
我：「係呀」
佢：「咁嘅樣嘅……」
你講咩呀？你咩意思呀？你做咩呀？你聽唔聽到我個心在瘋狂吶喊啊～
我：「你係咪睇醫生呀，係就同你登記」
唔係就滾！
佢繼續擔天望地唔睬我，閒時Ｒ吓褲襠，再閒時Ｒ吓胸前小釘……
卒之，佢忍唔住了：「喂，阿姑呀？你呢度個醫生有冇柄㗎？」
有，要唔要驗明正身呀？我唔知醫生願唔願意喎，或者你變做個靚女先呀？
我：「我哋醫生係男醫生啊」
佢：「都請埋啲咁嘅樣嘅……」
喂！你好啦喎～我前世定今世得罪你呀？咩嘢叫咁嘅樣呀？你嚟撩交嗌呀？排隊啦！年中大把人嚟同我撩交嗌呀，見唔見到隊尾喺邊呀？
我：「先生，如果你唔係睇醫生嘅，呢度冇嘢幫到你㗎啦」
佢：「你搵個好樣啲先嚟同我講嘢啦，嚡口嚡面！」
好，我搵寨主大家姐同你講。
我行入藥房：「報告大家姐，出面有人話要搵你」
大家姐雙眼泛起漣漪，行咗出去。
大家姐問叔叔：「你搵我呀？」
叔叔望望在大家姐背後的我，我包花生袋穩啦。
佢：「我嗌佢搵個好㗎喎」
大家姐：「我囉」
係囉，係囉，係囉。
叔叔冇出聲，一直望住食花生的我。
大家姐：「咁你搵我做咩呀？我行到出嚟你又唔出聲呀？係咪要我親自同你登記呀？有咩要專登嗌我出嚟呀？」
越不耐煩的她與越不敢發聲的他，這畫面真美。
大家姐：「＿！男人老狗嚟睇啫啫仔呀？唔出聲都幫你唔到㗎喎」
叔叔保持沉默離開診所。
我諗叔叔戀愛了。應該係。
文：寶豬姑娘
（中女珍寶豬，任職診所助護超過十年，經常使用逆向思維參透世事，包括⋯細閱大家姐。
FB： https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場。
