【now.com】細個會諗,拜年有利是收,幾大都去。
大個會諗,寧願有錢唔要,自己抖吓。
基本上,廿五歲過後,盡可能嘅,
拜年呢家嘢,我都係可免即免。
一嚟厭倦咗親戚問答大會,
當睇住堂家姐畀人問:「有冇拍拖?」
堂家姐:「冇。」
之後佢再問:「咁諗住幾時結婚?」
堂家姐被擊沉。
佢哋啲問題係冇Sense、冇脈路、冇體諒、冇經大腦、冇前因後果、冇起承轉合……
簡單啲講,成個過程,大家都係「搵啲嘢問」同「搵啲嘢答」。
點解會出現呢種情況?
因為大家都冇「聚頭的理由」,自然冇嘢好講。
細個會為兩張廿蚊利是而捱,大個咗就比較率性,繼而走避。
而且,新年呢幾日,都算係一年之中難得嘅幾日,可以耳根清靜,因為公司再忙,呢幾日都會停止運轉。
唔需要擔心WhatsApp嘅震動、連推銷電話都絕跡,你自然想好好休息。
雖然「拜年」就包含「強行要你見吓親戚」嘅意味,但年代都唔同晒。
佢唔貪我份賀禮,我就唔圖佢封利是。溝通家陣就咁方便,想見時隨時都可以飲個茶,唔需要特登逼晒喺年初一二三。
近年身邊一班老死開始成家立室,
我嘅朋友睇法都相近,有時新年上嚟聚下,佢都會話:「唔好買賀禮啦!」
之後再加句:
「你畀盒藍鑵我,我回禮返盒金莎畀你,真係有意思咩?」
冇錯,斬料加餸或者買下汽水就更為實用。
有時避年,除咗代表想安在家中,
亦都係想避走啲繁文縟節。
朋友講得啱:「真係熟嘅,使咩咁多禮?見到面已經夠啦。」
係囉,簡單啲,已經夠啦。
文:張晨
(將最不煩的事變成超煩,就是我們的平凡。)
FB: https://www.facebook.com/birdnoup
〈都市無情〉每隔周四刊登
專欄屬作者個人意見,不代表本網立場。