【now.com】必需承認,作為一個打工仔,可以獲得晉升嘅機會並唔多。
特別係身處大公司,因為制度僵化同budget嘅關係,有時候即使同一個部門有兩個傑出員工都好,好多時候上司都局住要二選一,落選嘅員工就因為意興欄柵辭職,而公司亦因為咁嘅原因而流失人才。
啱啱出黎社會做事嘅時候,我好緊張自己appraisal嘅分數。大公司一般以5分為滿分,4分獲得晉升,2分就會出警告信或者係僱員再培訓,1分將會被解僱。但基本上人事部或者老闆怕麻煩,又或者怕該同事會投訴去勞工處而多數唔會俾最低分數,亦即係話如果評分去唔到4分,成份appraisal根本就冇乜意思。
「材仔,今年你嘅表現唔錯,有3.9分,仲差少少就攞到4分可以升職,出年繼續努力,我睇好你!」
「多謝經理!我會繼續努力!」
獲得一個唔錯嘅分數,我以為自己就算冇得升職,但加薪幅度應該都會唔錯,點知加薪嘅結局係3%,而分數比我差同低嘅同事,就算得2.5分都好,都係一律加3%,當時嘅我覺得好唔開心,勤力做嘢又係加咁多,咩都唔做又係加咁多,既然係咁,我咁勤力做乜。
打工仔好簡單,講嘅永遠都係錢。細個聽阿媽講俾心機做嘢就會搵到錢,原來去到我哋呢一代,付出同收入係永遠都唔成正比。
加薪?加「辛」就有份!
之後,我領悟咗一個道理,喺職場浸淫得耐就知道對公司有感情係冇用,做嘢做得好唔好,上司喜唔喜歡自己根本上就係際遇同運氣。
更悲慘嘅係,如果公司有職位空缺,諗住坐定粒六自己有機會升職,點知大公司因為未到appraisal嘅時節,公司唔會喺年中有晉升而對外招聘,點知請返來嘅人又得過且過,咩都唔識,呢一種係真真正正嘅悲劇。
最近呢幾年,我已經冇期待過升職。一來就算升到薪酬加幅有限,二來我有料,根本就唔怕自己搵唔到好工,唔走嘅原因好簡單,只係因為同同事做得開心,而上司又係一個以事論事嘅人。
細個讀書我哋無可避免用分數去評高低,出到職場,所謂嘅分數根本就主觀兼冇認受性。
Appraisal與其上司一言堂,倒不如直接話俾我哋知有冇得升,年尾加幾多,咁樣先叫做真正嘅Management。
文:庸材
(八十後物業經理,網絡小說作家,喜歡平庸,更喜歡當塵世間迷途小書僮)
FB: https://www.facebook.com/yungchoi2012
〈不是庸材〉每隔周四刊登
專欄屬作者個人意見,不代表本網立場。