【now.com】你有幾耐冇打電話畀一個朋友?
當你答唔出一個「數字」,失去時間嘅概念,
證明呢個「好耐」的確夠晒耐。
記得一次我興致勃勃,想打畀一個老朋友吹下水。
但入到電話簿,
喺撳「撥號」嘅畫面,我停止咗所有動作。
當時係下午5點幾,
我諗人哋可能返緊工,萬一佢開緊會,我個電話咪阻住晒?
之後我決定等到下午6點⋯⋯
但我又諗人哋收工,一定喺條街度,又嘈又盛⋯⋯
於是等到夜晚8點,又擔心佢食緊飯⋯⋯
到夜晚10點,似乎再冇障礙,
不過我突然諗:「定係聽晚好啲呢⋯⋯聽晚星期五,佢應該Free啲。」
我一路都喺度搵一個最佳嘅時間,
而嗰一刻我就發現,
自己只係用「最佳時間」做借口,拒絕打呢個電話。
原來直接打一個電話,喺呢個時代已經需要好大勇氣。
每個人都有種「主觀」,
你既然想搵佢,自然想佢嘅反應係高興,願意同你促滕詳談。
只不過,心底裡面早就細膽,你好驚佢會變得冷淡。
你怕丟架。
口講咩「老相識」、「N年前勁Fd」,
但你心底對佢根本冇信心。
所謂「The best moment」根本唔存在,
因為你心中嗰個Best Friend都已經降格為Hi-Bye Friend。
你對佢嘅信心係Hi-Bye Friend,自然都怕大家只有Hi-Bye Moment。
最後你留低一個WhatsApp「Hi, How are you recently? Free to call? haha」
係囉,幾輕鬆,
一早Send WhatsApp咪好囉,點解要打電話?
「因為?因為同佢行得好埋嘅時光,大家永遠都係第一時間打電話⋯⋯唔需要經Msg⋯⋯我唔想個關係好似倒退咗咁⋯⋯」
你唔想,可惜好多嘢的確冇隨時代進步,
包括呢班需要先Send一個Msg先敢打電話嘅朋友。
文:張晨
(將最不煩的事變成超煩,就是我們的平凡。)
FB: https://www.facebook.com/birdnoup
〈都市無情〉每隔周四刊登
專欄屬作者個人意見,不代表本網立場。