【now.com】喺香港,只要有日本品牌殺到,就一定會有一班為食之士追捧,之前有抹茶乜乜乜,今次就有芝士甜品。上月Tokyo Milk Cheese Factory首家海外專門店登陸香港後,立即掀起一輪搶購熱潮,被喻為「日本旅遊十大必買手信」的牛奶芝士餅及艾登芝士餅開售數日內火速售罄。反應熱烈,Tokyo Milk Cheese Factory於西貢的總店都加快投入運作,已於1月9日正式開幕。雖然西貢店有田園風情,不過都略嫌唔就腳。Tokyo Milk Cheese Factory再增設pop up store,期間限定店將於1月15日登陸銅鑼灣希慎廣場,更特別推出獨家限定「草莓牛奶卷」(Strawberry Milk Roll),卷出啖啖香濃士多啤梨牛奶香!
由日本直送的「草莓牛奶卷」用上出產自日本九州福岡縣、有士多啤梨之王稱號的AMAOU博多甜王。粉紅色的鬆軟海綿蛋糕內,配上由北海道優質牛奶及白朱古力而製的牛奶忌廉慕斯及士多啤梨忌廉慕斯,再以自家製的果醬做夾層,聽落又真係比一般的卷蛋吸引。期間限定店將於1月15日至2月14日營業,購物滿HK$800,當中包括一條「草莓牛奶卷」,便可免費獲得限量日本版保溫袋一個。
Tokyo Milk Cheese Factory店鋪詳情:
西貢總店
地址:西貢普通道9號地下
時間:下午2時至晚上8時(星期一至五)
正午12時至晚上9時(星期六、日及公眾假期)
上環分店
地址:香港德輔道中323號西港城地下4-6號舖
時間:正午12時至晚上9時(星期一至日)
期間限定店
地址:銅鑼灣希慎廣場1樓中庭
時間:1月15日至2月14日,上午11時至晚上10時 (星期一至日)