【Now新聞台】截至早上11時，1小時内《彭博》用戶關注度上升最多的港股依次為聯想集團、 萬科企業、旭輝控股集團、中國移動、寶龍地產。
聯想近期冇乜特別消息，最近一單已經係10月，有報道指，電器品牌飛利浦喺美國提出指控，包括聯想、戴爾及海信等在內地生產嘅產品，違反反盜版條例，要禁止呢啲產品進口，但最終飛利浦敗訴。不過，呢單消息當時未有引起好大迴響，照計唔會依家先炒起股價，還是又炒公司可以受惠於疫情？
英皇證券研究部總監陳錦興指，聯想今日關注度高，未必關上面提及嘅事件，反而有機會同出貨量數據有關，因為聯想Q3桌上電腦出貨量按季有得升，由於疫情反覆，喺經濟復甦下令桌上電腦需求比想像中好及穩定。佢又話，聯想係一隻主要炒基本面嘅股份，中期業績出爐後，投資者都憧憬Q3業績唔太差，帶動股價醖釀低位回升動力。
